Moscow, Nohprah:
U President ka Russia, u Vladimir Putin, ha ka Sngi Ba-ar u la pynpaw ia ka bor jong ka Russia bad ong ba ka Russia ka la pynkhreh ia ka thma lada ka Europe baroh kawei ka kwah ban ïakhun thma pyrshah ia ka. Namar u la ong ba ki nongialam jong ki ri ka Europe ki ialeh ban pynthud bad pyn pulom ia ki jingthmu jong ka Russia shuwa ba un leit ban iakynduh ia ki heh nongialam ka US.
Kitei ki jingkynthoh, ki mih ha ka por ba u nongmihkhmat jong ka US, U Steve Witkoff bad u pyrsa jong U President Donald Trump, U Jared Kushner, ki don ha Russia, na ka bynta ka jingiakren ba kongsan halor ka jingpynkut noh ia katei ka thma, kaba la jan 4 snem mynta.
“Ngim thmu ban ia aireng ne ban ïakhun thma pyrshah ia ka Europe, hynrei lada ka Europe ka kwah bad ka sdang hi, ngi long ba la pynkhreh wat mynta- mynta ruh”, la ong u Putin ha ki nongthoh khubor ha Moscow.
“Kim don ka mynsiem jong ka jingsuk, ki don ha ka liang jong ka thma”, u la bynrap, da kaba pynkynmaw biang ïa ka jingong jong u, ba ki nongïalam ka Europe ki khanglad ïa ki jingpyrshang jong ka US ban pynïasuk ha Ukraine.
U la bynrap ba ki jingthmu jong ka Europe ban pynthud ia ki jingpyrkhat thymmai jong u Trump ban pynkut noh ïa ka thma, ki long tang ha kawei ka liang bad kata ka long ban khanglad pura ïa ka jingïasuk baroh kawei bad ban buh ïa ki jingdawa kiba ka Russia kam lah ban pdiang.
Ka US ka la wanrah ia ka jingthmu ‘draft’ kaba 28 tylli ki mat ban pynkut noh ia katei ka jingiakynad ba la neh slem bha hapdeng ka Russia bad Ukraine, ha kaba hadien la pynkylla noh haba la ioh ia ki jingshah kynthoh na ka Ukraine bad ki ri ka dew-bah Europe, kiba la kynnoh ba ka US ka sngap tang ia kiba bun ki jingdawa jong ka Russia.
Ka jingthmu ban pynkut noh ïa ka thma ka long ka jignthmu jong u Trump, hynrei ki ri Europe ki sheptieng ba ka lah ban pynbor ïa ka Ukraine ban pyndem hakhmat ki jingdawa jong ka Russia, khamtam eh ha kaba ïadei bad ki bynta jong ka Ukraine kiba la ioh kurup da ka Russia haduh kane ka kynti.
