Mawkyrwat, Nohprah 03
Ki Seng Longkmie, Seng Samla Shnong bad Village Defence Party (VDP) ryngkat ka Dorbar Shnong Mawkyrwat lyngba ka jingtrei shitom da ki bun tylli ki bnai kum shibynta ban tehlakam ïa ka jingjyllei ka kam die kyiad beaiñ ha ïew Mawkyrwat ki la ïoh ban kurup kumba 83 synduk ka kyiad phareng bad kumba 500 litre ka kyiad pyrsi na ïew Mawkyrwat kiba la buhrieh bha ha ki ïing jah, ki kyndong kynshrot bad na ki kali.
Ïa kine ki kyiad kiba la ïoh ban kurup la bun bnai, ha ka 3 tarik u Nohprah, 2025, la rah noh ïa ki ban theh ha madan Jakar, Mawkyrwat bad la ïoh ruh ïa ka jingïalang lyngkot ha kaba la ïadon lang ki nongïalam Shnong Mawkyrwat, ka Seng Samla, ka VDP bad ka Seng Longkmie, ha ryngkat ka jingsakhilang jong u Bah B Jyrwa, MPS, Superintendent of Police ka South West Khasi Hills District, u Bah RR Lyngkhoi, Myntri Shnong Mawkyrwat, ki Myntri bad ki Secretary Shnong jong 12 tylli ki shnong kiba marjan hapoh ka thaiñ.
Lah ban kdew ba kane ka jingleit khynra bad jingkurup kyiad ka la long naduh u bnai Jymmang haduh u Nohprah, 2025, ïa kaba ka Dorbar Shnong Mawkyrwat bad ki seng trei mon sngewbha kum ka Seng Samla, ka VDP bad Seng Longkmie ki la shimkhia ban pyrshah ïa ka jingdie beaiñ ïa ki kyiad hapoh ka ïew Mawkyrwat.
Haba ai jingkren ha kane ka sngi, ki nongïalam shnong Mawkyrwat ki la maham tyngeh ruh ïa ki briew kiba ju mlien ban wanrah bad die kyiad ha ïew Mawkyrwat ba kim dei shuh ban leh ïa kine ki jait kam hapoh ïew namar ka jingdie kyiad kam ktah tang ïa ka imlang sahlang hynrei ki wanrah ruh ïa ki jingsniew ba har rukom.
Ki la pynpaw ruh ba kim dei ba ki ñiew beiñ ne leh beiñ ïano-ïano hynrei ka jingangnud jong ki, ka long ban rat dyngkhong ïa ki jingsniew khamtam ka kyiad bad u drok kiba long pyrshah ïa ka imlang sahlang.
La ïoh jingkren ruh na u SP ha kaba u la ai ka jingïaroh ïa ki Seng Longkmie, ka VDP bad Seng Samla Shnong kiba la trei shitom la bun bnai ban ïoh kurup ïa ki kyiad bad u la kular ba ka tnat pulit kan ai ïa ka jingïatreilang bad ka shnong Mawkyrwat bad kiwei ruh kumjuh khnang ban tehlakam ïa ki jingsniew khamtam ïa u drok uba la sdang jyllei hapoh kane ka dong ka thaiñ.
Ha kajuh ka sngi, ka Dorbar Shnong Mawkyrwat ka la pynkup burom kyrpang ïa u Bah R Rymbai, Traffic Officer jong ka thanad Mawkyrwat bad kiwei.
Kiba ai jingkren ha kane ka sngi ki long Bah DD Thongni, President VDP, Bah WCD Toi Secretary, Bah P Nongsiej, Headman Mawkyrwat, Kong MK Lyngdoh, President Seng Longkmie, samla Kitborsing Lyngdoh President Seng Samla Mawkyrwat bad kiwei-kiwei.
