Shillong, Nohprah 03
Ka National People’s Party (NPP) ka long kaba la khreh ban pynbna ïa ki kyrtong (jong ka) na bynta ka ilekshon ban wan sha ka Garo Hills Autonomous District Council (GHA DC), ong u Working President bad Myntri Sorkar, u Marcuise N. Marak.
“Ngim pat shim ïa ka rai kut haba ïadei bad ki kyrtong kumba long mynta. Ka jingpdiang ïa ki aplikeshon ka la kut na ka bynta ban pan tiket na ka seng. Ngin sa bishar bniah bad shen ngin sa don ïa ka jingïalang jong ka komiti ilekshon jong ngi ban rai ïa ka sienjam nangne shakhmat,” la ong u Marak haba kren sha ki nongthoh khubor ha ka Sngi Balang.
Ka NPP ka la ïoh pdiang bun tylli ki aplikeshon na ki konstitwensi bapher-bapher, ha kaba ki don kumba lai haduh hynñiew ngut ki kyrtong kiba pan tiket na kawei-kawei ka konstitwensi.
“Ngin sa pynïeng kyrtong na baroh 29 tylli ki konstitwensi,” la pyntikna u Marak.
Une u nongïalam ka NPP u la kyntait ruh ïa ki jingkam jong ka Congress ba ka la sdang ïoh lyer ha Ri-lum Garo hadien ka jingwan pynïasoh biang u nongmihkhmat barim ka Rangsakona, u Zenith Sangma lem bad kiwei-kiwei ki nongïalam.
“Ngi la pynrem ïa ka kurim jong u Zenith Sangma bad ngi la jop ïa ka ilekshon shiteng samoi ha Gambegre, kumta ngi sngew skhem ba ngin sa leh bha,” la ong u Marcuise N. Marak, Working President ka NPP bad Myntri Sorkar.
Shuh shuh u Marak u la kubur ïa ki jingpyrshang na ka liang ka Congress hynrei u la kyntait ïa ki lad na bynta jong ki, da kaba ong, “Ngi shim ba ki jingeh ki dei shi bynta jong ka jingïakhun, hynrei ngan ym ong ba ka dei ka jingtynjuh. Ngin sa ïohi ha ka ilekshon, hynrei tikna, kata kam dei ban long ka jingeh ïa ngi.”
