Shillong, Nohprah 03
Ki khynnah ïalehkai phutbol kiba hapoh 14 snem jong ka Meghalaya ki la jop da 2-0 kol ïa ka Haryana ha ka lympung ïalehkai 69th National School Games kaba la long ha ka sngi Balang ha Umaria, Madhya Pradesh.
Ïa kine ki ar tylli ki kol na ka bynta ka Meghalaya la thep da u Ram Passah ha ka minit kaba 24 jong ka kylla step bad ïa ka kol kaba ar la pynbud da u Marbeh Mukhim ha ka minit ba 52 jong ka kylla miet.
Ha kane kajuh hi ka sngi, ka Meghalaya ka la ïakhun biang sa ïa ka CISCE ha kaba ki la ïakhaid mar 1-1 kol.
Ka Meghalaya ka la pynkhih jar nyngkong eh lyngba u Marbeh Mukhim ha ka minit kaba 56, hynrei shwa ban wai ka CISCE ka la lah ban pynïakhaid lyngba ka penalty.
Ka Meghalaya ka la pynkut ïalade ha kane ka Pool-D da 5 poiñ, kumjuh ka CISCE ruh ka la ïoh khur 5 poiñ bad ka tam ïa ka Meghalaya lyngba ka jingïapher ha ka jingthep kol.
Ha ka sngi Palei, ka Chhattisgarh kan aireng pyrshah ïa ka Haryana ha ka jingïalehkai ba khatduh jong kane ka Pool. Te kumta tang kawei ka kynhun ka ban ïoh rung sha kawei pat ka wat ne round jong kane ka lympung ka sngewthuh ba ka Meghalaya kam don jingkyrmen shuh ban ïoh rung sha kawei pat ka wat jong ka jingïakhun.
