Shillong, Nohprah 03
U Myntri Rangbah barim ka Jylla u Mukul Sangma uba dei ruh u nongïalam ka TMC u la kyntait ban leit pynïasoh biang sha ka Congress, da kaba ong ba ka jingmyntoi u paidbah ka Meghalaya, ka kham lah ban ïa kiei-kiei baroh.
Haba kren shaphang ka rai jong u para jong u, u Zenith Sangma ban rung biang sha ka Congress, u Mukul u la ong, “Phi kren ïa kaei-kaei ka kam kaba kthang. Mynta ka jingmyntoi jong ki paidbah ha ka Jylla ka kham lah ban ïa kiei-kiei baroh. Ka kham lah ban ïa ka jingmyntoi jong kano-kano ka seng saiñ pyrthei, ne ki seng ba don ha ka bor.”
U Mukul u la ban jur ba ka rai jong u ban mih noh na ka Congress ka dei kaba sngewthuh bad kaba la thew bad puson bha, da kaba ong, “Nga la shim ïa ka rai kaba sngewthuh bha, kam dei ba nga shu kynthih khlem da pyrkhat aiu ban leh, khlem da don ka jingthmu na ka bynta ka lawei.”
U la pynpaw ïa ka jingkut jingmut jong u na ka bynta ka roi ka par jong ka Meghalaya, da kaba ong, “Nga don ïa ka lynti ïaid kaba la pruid dak bha na ka bynta ka Jylla Meghalaya kum uwei na ki dkhot uba la ïoh ïa ka kabu ban shakri ïa ka Jylla ha kaba tei lang ïa ka Jylla ryngkat bad kiwei pat ki nongïalam jong ka Jylla.”
U Mukul u la ban jur ba ka jingïada ïa ka jingmyntoi jong ka Meghalaya ka dei ka jingkitkhlieh lang, bad teng-teng ka donkam ban wad ïa kiwei pat ki lad ki lynti.
Shuh shuh, une u Nongïalam ka Liang Pyrshah u la ban jur ba ka jingim long nongïalam paidbah jong u kam dei satia ka kam ba kut tang ha ka longïing marwei.
“Ka longïing longsem kan ïai neh ka longïing longsem, hynrei nga kwah ïathuh ïa phi kawei ka kam….shisien ba nga la rai ban don ha ka kam shakri paidbah, ngam dei shuh u nongpeit tang ïa la ka jong ka longïing,” ong u Mukul.
U la ban jur ba ka jingtrei bad ka jingaiti jong u ha ka jingshakri paidbah kan kren hi dalade, da kaba bynrap, “Ka jingtrei jong nga ha kine ki phew snem, kaba la ïohi da ki paidbah, kan long ka sakhi ïa kaei kaba nga ong.”
U Mukul u la pynpaw ruh ïa ka jingshaniah ba ka rukom treikam jong u ha ka jingim paidbah, kaba pynleit jingmut ha kaba shakri ïa ki paidbah ym ïa ka jingmyntoi shimet, kan paw ba ka dei kaba dei. “Nga lah ban ieit ïa la u para, hynrei nga don da ki spah hajar ngut ki hynmen bad ki para, ki khun ksiew… kata ka dei ka jingsngew skhem kaba nga la ju trei,” u la ong.
Ha kaba ïadei bad ka rai jong u Zenith, u Mukul u la ong, “U lah ban pyrkhat bad don ka jingsngew ba ki jingangnud jong u kin sa urlong lada u kynriah, hynrei u lah ban bakla… Ngan pynshisha ïa kata”.
