Shillong, Nohprah 03
Ka Sorkar Jylla ka la rai ban kyrpad ïa ka jingtuklar jong u Myntri Rangbahduh ka ri, u Narendra Modi ban pyllait ïa palat T.700 klur na ka bynta ban pynkhuid ïa ki ‘Bill’ ba dang sahteng sha ki kontraktor kiba pyntreikam ïa ki projek Jal Jeevan Mission (JJM) ha Meghalaya hashuwa ka Khristmas.
“Ka Meghalaya ka dei ka Jylla Khristan bad ka dei ka kamram na ka liang ka Sorkar Megha-laya ba ngin shimkhia ïa ki briew lajong. Da kaba buh jingmut ïa kane, ngi trei minot ban buddien bad ban pynkohnguh ïa ka Sorkar India ban pyllait ïa ka pisa sha baroh ki Jylla Khristan kynthup ïa ka Meghalaya,” ong u Myntri ka tnad PHE, u Marcuise N. Marak haba kren sha ki nongthoh khubor ha ka Sngi u Balang.
U la pyntip ba u Myntri Rangbah ka Jylla, u Conrad K. Sangma u la ïakynduh ïa u Myntri Sorkar Pdeng ka tnad Jal Shakti, u CR Patil bad aiti ruh ïa ka dorkhast halor kane ka bynta ha u snem ba la dep.
“Lada kam jia eiei, nga la dep ong ïa u Myntri Rangbah ba ngi dei ruh ban ïakynduh ïa u Myntri Rangbahduh (ban pynbeit ïa kane ka jingeh),” la ong u Marak.
Katkum ka jingong u Myntri, ka jingpynslem ban pyllait ïa ka pisa JJM ka dei ka mat ha baroh kawei ka India naba ka ktah ïa baroh ki Jylla.
“Ki ‘Bill’ JJM (kiba kot sha ka T. 700 klur) ym pat shym la siew sha baroh ki kontraktor namarba ngim pat ïoh pdiang ïa ka jingpyllait pisa na ka Sorkar India,” u la ong bad bynrap “…namar ki ‘Bill’ kiba sahteng, ngim lah wat tang ban kyntu ïa ki kontraktor ban trei tyngeh. Kumta, ka kam ka la jan sahkut hangta.”
Haba pynpaw ba palat 83% ki kam JJM la lah ban pyndep ha ka Jylla, u Marak u la ong ba ka Sorkar Pdeng ka la pynjlan ïa ka por ba la buh haduh u snem 2028.
“Ka Sorkar India ka la bthah ïa baroh ki Jylla halor ka jingdonkam ban pynbeit ïa ka jinglut kaba la palat ïa kaba la pynlut hajan baroh ki projek,” u la ong haba pynbna ïa ka jingtreikam ba dang ïaid jong ka tnad ban pyndep ïa ka kam haba ïadei bad ka ‘Geo-Tagging’ jong baroh ki projek.
