Tehran, Nohprah:
Katkum ki khubor, la ong ba ka Iran ha kane ka por, ka mad ia kawei na ki jingkyrduh um ba shyrkhei tam ha kine ki phew snem bad ka jinglong jingman ha ka nongbah Tehran, ka la kylla long kaba shyrkhei. U President Masoud Pezeshkian u la pynpaw ba ka sorkar ka lah ban hap shu ai rashon noh ïa ka um lada ym ioh slap haduh une u bnai Nohprah, da kaba bynrap ba lada ki jinglong jingman ki dang ïai bteng ban sniew, ki nongshong shnong “ki hap ban kynriah jaka ne phet shnong noh.”
Na ka bynta ka nongbah kaba don kumba 15 million ngut ki briew, ka jingtyrkhong jong ki kor um ka la wanrah ka jingsngewkhia kaba jur. Ha kaba sdang jong une u bnai, ki riewngeit Muslim ki la ïalum lang ha kawei ka jakamane Muslim ha Tehran, da kaba duwai ban ïoh slap hapdeng ka jingkhriat kaba jur kat nang mih ki sngi bad kat nang ïaid sha ka aïom Tlang kaba pura.
Katba ka Iran ka dang ioh ia ka jingpyrkhat kaba kham bun, ki riew shemphang kin ong ba katei ka jingeh ka la saphriang kylleng kylleng. Kumba 20 tylli ki nongbah kim shym la ïohi satia wat tang shi drop u slap naduh kaba kut jong u bnai Nailur, katkum ka khubor na u nongwad bniah jong ka University of California, Davis u Mohsen B Mesgaran. Ki lad pathai khubor ki pynshisha ruh ba kumba 10% na ki dam jong ka Iran, ki la tyrkhong lut mynta.
Ka Iran, ka mad mynta ia ka jingtyrkhong kaba shyrkhei tam ha kine ki shiphew snem, ong u Amir AghaKouchak jong ka University of California, U Irvine, haba ai jingkren sha ki lad pathai khubor.
Ki jaka pynlang um ba kongsan jong ka Tehran ki la jan duh bad tyrkhong noh baroh. U Mohsen Ardakani, uba dei u khlieh jong ka tnat sam um jong ka nongbah, u la iathuh ba ka jingdon ka um mynta ka la long sa tang kumba 11%.
