Shillong, Nohprah 03
Ka kynhun ïalehkai Under-11 bad Under-13 jong ka PFR Football Academy ha ka sngi Balang ka la mih na ka nongbah ban leit shim bynta ha ka International Super Cup ka ban long ha Thailand, Bangkok naduh 6 tarik mynta u bnai.
Ha kane ka lympung, ka PFR kan ïakhun pyrshah ïa ki klob kiba na ka ri Thailand, Indonesia bad Phillipines.
Ka kynhun ïalehkai Under-11 ka PFR ka la shah pynngat ha ka Group-B ha kaba kan ïakhun 5 tylli ki jingïa-khun ha ka League Stage, katba ka kynhun ïalehkai Under-13 ka la don ha ka Group-C ha kaba kan ïakhun 6 tylli ki jingïaleh -kai hapoh ka League.
Haba ïakren bad ki Coach kata ka Nylla Meri Wahlang bad u Jewelson Lyngdoh, ki la ong ba baroh ar ki kynhun ki la long ba la pynkhreh bha bad ki kyrmen ban ïoh kheit ïa u soh ka jingjop kaba long ka burom ïa kane ka shlem ai jinghikai ka Jylla bad ka ri hi baroh kawei.
