Shillong, Nohprah 03
Ka North Eastern Hills University ka la rakhe ïa ka sngi kyrpang Academic Excellence and International Collaborations ha kaba u Bah Ferdinand Lyngdoh Marshillong, u briew uba don jingduna ha ka bor ïohsngew, uba dei ruh uba pule PhD ha ka Department of Linguistics ha NEHU u la ïoh ïa ka khusnam ba pawnam ka ri.
U Bah Ferdinand u la ïoh ïa kane ka khusnam “Shresth Divyangjan” na ka Ministry of Social Justice and Empowerment, Department of Empowerment of Persons with Disabilities, Government of India. Ha kaba ïa kane ka khusnam la ai da ka President ka Ri India ka Droupadi Murmu, ha ka jingrakhe ïa ka sngi leh burom ïa ki briew ba don jingduna dkhot met (International Day of Persons with Disabilities) ha Vigyan Bhawan, New Delhi.
U Bah Ferdinand uba dang ïaleh ïa ka PhD jong u halor ka phang “Khasi Sign Language: Acquisition, Structure and Social Implications of Indigenous Signs” hapoh ka jingpeit jong ka Dr. Saralin A Lyngdoh, ha kaba u la ïoh ïa ka jingithuh ha ka ri namar ka jingnoh synñiang jong u sha ka jingpynkupbor bad ka jingpynrung ïa ki briew kiba duna dkhot met.
Ka jingpule jong u, kaba wad bniah ïa ka ktien ka thylliej bad ka jinglong jingman ka ‘Sign Language’ ha ka jinglongtrai bad imlang sahlang ki Khasi, kaba pyni ïa ka sienjam ba kyrpang sha ka jingthoh ïa ki dak tynrai bad ka jingkyrshan ïa ka rukom kren khana ha Meghalaya bad kylleng.
Ka NEHU ka la ai ka jingsngewnguh ïa u Bah Ferdinand na ka bynta ka jingwanrah nam wanrah burom jong u ïa ka Skulbah bad ïa ka thaiñ bad kaba long ruh ka jingai mynsiem sha ka imlang ka sahlang.
