Shillong, Nohprah 03
Ka kashari jong u Chief Judicial Magistrate ka East Jaiñtia Hills District, u Bah Albert W Lanong ka la pynksan ïa ki nongïalam jong ka Meghalaya People United Front (MPUF), kiba la shah pynngat mukotduma ha ki pulit ka Lad Rymbai Police Outpost ha u snem 2019.
U Bah D. Wanmi Laloo President ka MPUF ha ka jingïakren sha ki nongthoh khubor ha ka sngi Palei, u la ïathuh ba ka jingshah pynngat mukotduma jong ki, ka dei hapoh ka section 468/471 jong ka IPC 1860 bad katkum section 11 jong ka Prevention of Cruelty to Animals Act, 1860.
U la ong ba kane ka jingshah pynngat mukotduma ki nongïalam ka MPUF ka dei ha u snem 2019, ha ki Pulit jong ka Lad Rymbai Police Station hadien ba ki nongïalam ka seng ki la pan jingpynshai halor ka jingbat ïa ki kali kit masi kiba don ïa ki kot ki sla kiba biang na ka tnat Veterinary.
U la ïathuh ba ïa kane ka mukotduma la pynïaid katkum ka aiñ na ka bynta jong ka MPUF da u Advocate u A. Sympli. Ïa ka ‘record’ na ka ïingbishar la pynskhem da u Albert W Lanong, u Chief Judicial Magistrate ka East Jaiñtia Hills.
U la pyntip ba hadien ka jingbishar kaba bniah ka District and Session Court jong ka East Jaiñtia Hills District ha ka 12 tarik Naiwieng 2025 ka la pynmih ïa ka rai kaba pynskan ïa ki nongïalam jong ka Meghalaya People United Front.
