Agartala, Nohprah:
U Myntri Rangbah ka jylla Tripura u Manik Saha kumba u la pynbna u la ong ba ka jingdon jong ki kor CCTV ka la ai jingmyntoi shibun na ka bynta ka jingbuh jingshngaiñ ha ka jylla.
U la ong ba ka jingpynthymmai ïa ki rukom pyntreikam jong ki pulit ka Tripura halor ki lad jingïada, ka la sdang ban shim ki sienjam na ka bynta ban pynurlong kumba la thmu.
U la pyntip ba ka sorkar jylla ka thmu ban wanrah ïa ki kor ki bor kiba kham thymmai kum ki kamra pynïaid ba pyndonkam da ka AI, ki Drone, ki smart CCTV, bad ki System ba la pynbha ha ka kyrdan jong ki distrik bad ki jylla.
U Saha u la ong ba ki bor pulit ki don ka bynta kaba kongsan bha ban pynthikna ïa ka jingshngaiñ jong ki paidbah bad ban pyntreikam ïa ka aiñ.
U Myntri Rangbah ka jylla u la pynpaw ka jingsngewnguh ïa ki Bank kiba la kyrshan ïa ki bahaïing hasem jong ki pulit kiba la aiti ïa la ka jong ka jingim ha ka jingshakri bad u la pynpaw biang ïa ka jingangnud jong ka sorkar na ka bynta ka jingbha jingmiat jong ki paidbah bad ki pulit.
U Myntri Rangbah u la ïaroh ruh ïa ki pulit bad ki shipai Tripura State Rifles (TSR) kiba la pynlong ïa palat 25 hajar tylli ki kam pynbha ïa ka imlang-sahlang ha ki lai snem ba la leit, kiba la ai jingmyntoi ïa palat san lak ngut ki nongshong shnong.
U la pynbna ruh ban pynkiew ïa ki jingsiew na ka bynta ki jingbam rashon, ki Uniform, bad ki jingsiew Dearness Allowance (DA) kum shi bynta jong ka jingpyrshang jong ka sorkar kaba dang ïaid shakhmat ban pynbha ïa ka jinglong jingman jong ki pulit.
U la ong ba ka jingpyntreikam ïa ki kor ki bor katkum kane ka juk kaba mynta ka la buh jingshngaiñ ha ka imlang ka sahlang khamtam ha kaba ïadei bad ka jingtehlakam bad ka jingkhanglad ïa ki kam sniew ba ki riewshim kabu ban leh ïa ki kam pyntriem ha kylleng ki jaka.
