Shillong, Nohprah 03
Ka Sorkar Meghalaya kala sdang ïa ka ‘survey’ halor ka jingdon ki nongdih drok ha baroh kawei ka Jylla, kaba thmu ban lum jingtip ban pyntip ïa ki jingïarap kiba pynshong nongrim ha ki sakhi na ka bynta ban ïada, ai jingsumar ïa ki nongdih, ai jingïarap ba kin lait noh na ka jingkyrni, bad ka jingkyrshan ka imlang sahlang.
Ïa kane ka ‘survey’, ka ban leh da ka Sankardev College, Shillong, ha ka jingïatreilang bad ki Seng jong ki nongdih drok, kan sdang da ka jingpyrshang shuwa ha sor Shillong bad hadien kan sa ïaid sha baroh ki District ka Jylla.
“Ka jingïalang ba mynta ka sngi ka dei ka dak ka jingïasoi soskular hapdeng ka DREAM Mission bad ka Sankardev College, Shillong, ka jingïatreilang ka ban pynkhlaiñ ïa ki sienjam ba dei ban leh katkum ka jingstad saian bad ka jingwad bniah halor ka jingktah jong u drok ha ka Jylla,” ong u Director ka DREAM, Bah Francis Kharshiing ha ka sngi Balang.
U la ban jur ïa ka jingkongsan ka ‘survey’ bad ong “Ki jingshem kin pynlah pat ïa ka Sorkar ban thaw ïa ki lad jingïarap kiba thikna, kiba pynshong nongrim ha ki sakhi ban ai jingïada, ai jingsumar ïa ki nongdih, ïarap ba kin lait noh na u kynjri bad ka jingkyrshan ka imlang sahlang”.
Ka ‘survey’ ka dei ka sienjam ba kongsan ha ka mishon jong ka Sorkar ban ïakhun pyrshah ïa u drok bad ban ïada ïa ka lawei jong ki samla ka Jylla.
Ka jingïashimbynta lang ki seng jong ki nongdih drok kynthup ïa ka MUF bad MeduNet, ka pyni ïa ka jingkut jingmut jong ka Sorkar sngewthuh lem, ban burom bad kynthup lang.
U Myntri Rangbah ka Jylla Conrad K Sangma u la pynskhem ïa ka jingkut jingmut jong ka Sorkar, haba ban jur ba ka jingïakhun pyrshah ïa u drok ka dei ka jingkitkhlieh lang jong ka Sorkar, ki jaka treikam, ki shnong ki thaw, bad ka imlang sahlang baroh kawei.
“Ka Sorkar ka la kut jingmut shisha ban ïada ïa ki samla na ka jingma jong u drok, ka jingai jingkyrshan bad ki lynti jong ka jingkoit jingkhiah na ka bynta kito kiba shah ktah bad ban ai bor ïa ka imlang sahlang ban ïashimbynta lang ha ka lynti ban lah ïakhun ,” ong u Conrad.
