Itanagar, Nohprah:
Ka Arunachal Pradesh State Election Commission (SEC) ka la pynbna ha ka 30 tarik Naiwieng ba ki don 63 ngut ki kyrtong kiba la shah jied khlem don ba ïakhun pyrshah ha kane ka ilekshon Municipal bad Panchayat ban wan kaba la buh ban long ha ka 15 tarik u Nohprah.
Ka SEC ka la pynpaw ba ka BJP kaba synshar ka la jop haduh 58 tylli ki zila parishad konstitwensi khlem don ba ïakhun pyrshah, katba kawei ka shuki ka la leit khlem ïakhun sha u kyrtong ka National People’s Party (NPP).
Nalor kata, saw ngut ki kyrtong ka BJP ki la shah jied khlem don ba ïaleh pyrshah sha ka Itanagar Municipal Corporation (IMC). Ka por ba khatduh ban weng kyrteng ka la kut ha ka sngi Saitjaiñ.
Hadien kane, ki don 440 ngut ki kyrtong ki ban ïakhun na ka bynta ki 186 tylli ki zila parishad seat, 39 ngut na ka bynta ki 16 tylli ki ward jong ka IMC, bad 21 ngut na ka bynta ki 8 tylli ki ward jong ka Pasighat Municipal Council (PMC).
Baroh ki kyrteng ba la thep ki long 600 tylli na ka bynta ki 245 tylli ki zila parishad konstitwensi, 10,550 tylli na ka bynta ki 8,182 tylli ki gram panchayat seat, 101 tylli na ka bynta ki 20 tylli ki ward jong ka IMC, bad 28 tylli na ka bynta ki 8 tylli ki ward jong ka PMC shuwa ban kut ka 24 tarik u Naiwieng.
Ka jingpeit bniah ïa ki kyrteng la pyndep ha ka 26 tarik u Naiwieng.
Ka Commission ka ïathuh ba ki don 13 tylli ki gram panchayat konstitwensi ki bym shym la ïoh thep kyrteng, katba 14 tylli kiwei pat ki la shah kyntait ha ka por ba la pynlong ïa ka jingbishar bniah.
Ka jingthep vote ha Dumba Singpho gram panchayat konstitwensi la pynsangeh noh hadien ka jingkhlad noh jong u kyrtong uba la thep kyrteng.
Kine ki jingdon jong ki ki long kiba shipor, bad ïa ki jaka ba lait yn pyndap ha ki ilekshon shiteng samoi ka ban long kham hadien.
Ka jylla kan pynlong ïa ka ilekshon panchayat kaba 12 bad ka ilekshon municipal kaba lai na ka bynta ka Itanagar bad Pasighat ha ka 15 tarik u Nohprah.
