Ranchi, Nohprah:
Ka sorkar Jharkhand ka la sdang ïa ka rukom ban shimkhia ha ka aiñ ban pynurlong ïa ka bai dewïong kaba la dep ban buh na ka sorkar kmie.
Ka sorkar ka la pynmih ïa ka jingpynbna kaba ai bor ïa u Secretary, ka Revenue, Registration bad Land Reforms ban sdang ïa ka rukom treikam katkum ka aiñ ban pynurlong ïa ki jingsiew.
“Ïa u Secretary, ka Revenue, Registration bad Land Reforms la jied kum u nodal officer ban sdang ïa ka kam aiñ mardor ban pynurlong ïa ka bai lutksan kaba T.1.36 lak klur na ka sorkar kmie.
“Lada don ki jingkhanglad ha ka jingsiew da ki Subsidiary jong ka Coal India ha ka jaka jong ka bai Washed Coal Royalty bad kiwei kiwei, dei ban shim ïa ki sienjam ban pynbeit ïa kane da kaba ïamir jingmut bad u Advocate General”, la ong ka jingpynbna.
U Myntri Rangbah ka jylla u Hemant Soren ruh u la ong hadien ba u la shah pynsmai ha u bnai ba la dep ba yn sdang ïa ka aiñ ban pynurlong ïa ki jingsiew.Shwa ïa kane, u la kyrpad ïa ka sorkar kmie “da kaba pynkhih kti” ban pynkhuid ïa ki jingsiew dewïong kiba bun klur sha ka jylla.
Ha u Naiwieng, u la ong, “U Myntri Rangbahduh bad u Myntri kam pohïing kin leit sha Jharkhand. Nga kyrpad biang sa shisien ïa ki da ki kti ba kin pynkhuid ïa ka pisa ba dang sah (jong u dewïong) kaba T.1.36 lak klur sha ki nong Jharkhand. Kane ka pisa ka long kaba kongsan bha na ka bynta ka Jharkhand.” “Ngan kyrpad ruh ïa ki paralok jong nga na ka BJP, khamtam ïa ki MP, ba kin ïarap ïa ki nong Jharkhand ban ïoh ïa ka bainong jong ngi.”
U la ban jur ba ki jingsiew bad ki PSU pdeng kum ka Coal India ki long kiba “hok” ïa ka jylla, bad u la kam ba “ka jingbym lah ban pynkhuid ka wanrah ïa ka jingma kaba ym lah ban pynbeit ïa ka roi ka par jong ka Jharkhand”.
Ka rai kaba dang shen da ka kynhun jong ka ïingbishar ba ha khlieh duh kaba don hynriew ngut ki nongbishar ka la pynskhem ïa ka hok jong ka jylla ban lum ïa ka bai tih mawshun bad ka bai lutksan jong ka.
