Shillong, Nohprah 03
Ka Mawkasiang bad ka Mawkriah West ki dangdon jingkyrmen ban don ha ka thong jingïaknieh ban ïoh rung sha ka semi final ha ka lympung ïalehkai SSA Champions Cup 2025, hadien ba ki la khur jingjop ha ka sngi Balang ha SSA Stadium kaba ha First Ground, Polo.
Ha ki jingïakhun kiba la long ha ka sngi Balang, ka Mawkasiang ka la lah ban pynliem ïa ka Umlyngka da 2-1 kol na ka bynta ka Group-A bad ka Mawkriah West ka la lah ban pynliem ïa ka Mawlynrei da 4-3 kol ha ka Group-B.
Ïa ki kol na ka bynta ka Mawkasiang la thep da u Samlang Rympei (43) bad u Lamshai Jana (67), katba ïa ka shi kol na ka bynta ka Umlyngka la thep da u Babitlang Wahlang ha ka penalty ha ka minit kaba 52.
Kane kan dei ka lai point ba nyngkong ïa ka kynhun ïalehkai ka Mawkasiang na kane ka lympung lem bad ka shi poiñ ba ka la ïoh ban khur na ka jingïakhun kaba nyngkong, ka pynlong ïa ka ban khur 4 poiñ bad ba kan khreh ban ïakhun pyrshah ïa ka Langsning (kaba la kamai 7 poiñ), bad lada jia ba ka Mawkasiang ka jop ïa kane ka jingïakhun ka lah ban poi sha ka semi final.
Katba ha ka jingïakhun kaba ar, u Enestar Malngiang u la khur ïa ka hat-trick hadien ba u la thep lyngba ka penalty ha ka minit kaba 29, kumjuh ha ka minit ba 40 bad 51. Katba ïa kawei pat la pynbud da u Calbessius Pathaw (38) na bynta ka Mawkriah West. Ïa ki lai tylli ki kol na ka bynta ka Mawlynrei la thep da u Alem Khongwir (67 & 79) bad u Ferdinand Pyngrope (17).
Kane kan dei ka nam jop ba nyngkong ïa ka Mawkriah West bad ban khur 3 poiñ, ha kaba ka thong ïa ka ban jam sha ka semi final, kan shong pat na ka jingmih ha ka jingïakhun ha ka sngi Palei hapdeng ka Nongkseh bad ka Shillong Lajong FC.
Lada jia ba ka Nongkseh ka ïakhaid, kane ka la biang pura ban buh jaka sha ka semi final, hynrei lada jia pat ba ka shah rem, ka rai ïa kane ka kynhun ban jam sha ka semi kan long haduh ka sngi Saitjaiñ ha kaba kan mih madan ban ïakhun pyrshah ïa ka Mawkriah West.
Nalor kata, ka Laitkyrhong (3 poiñ) ka lah ban ïoh 6 poiñ lada ka lah ban pynliem ïa ka Mawlynrei ha ka jingïakhun ka ban long ha ka sngi Thohdieng.
Ka jingïalehkai ha ka sngi Palei kan long hapdeng ka MLP FT pyrshah ïa ka Mylliem Lum ha ka por 1 baje nohphai sngi, katba ha ka por 4:30 janmiet ka jingïakhun kan long hapdeng ka Nongkseh bad ka Shillong Lajong.
