Shillong, Nohprah 03
Kawei ka longkmie ka la shu shah thok ei kha-ma-kha ka pisa kaba kot palat ïa ka T.15 lak lyngba ka rynsan social media.
Katkum ka khubor na ki pulit la ong ba kawei ka longkmie kaba dei ka nongshong shnong jong ka East Khasi Hills ka la ai ka jingujor ba ha ka 15 tarik Naiwieng, 2025, ka la shah kynthup ha kawei ka WhatsApp group ‘PK-147’, ha kaba ka la bei pisa (invest) haduh T.15,41,003/- bad ha kaba la bthah ïa ka ban pyndep ïa ki kam ba la ai lyngba ka online ba kan ïoh pdiang ïa ka commissions.
Hynrei kham hadien kane ka longkmie ka la sngewthuh ba ka la dep ban shah thok shah shukor.
Ha kawei pat ka khubor, ka Kong Ritibabok Kurbah ka la ai ka jingujor sha ki pulit pyrshah ïa ka Gardinia Shylla, ka Manager jong ka M/s Fratelli Guest House, Upper Lachumiere, Shillong, da kaba kynnoh ba ka la pyndonkam bakla (ha u Naitung, 2025) ïa ka pisa kaba long T.8 lak na kane ka Guest House.
