Shillong, Nohprah 03
Ki runar ki bym lah ban ithuh, ki la ïoh ban rah tuh ei ïa ka pisa da ki lak tyngka na kawei ka skul ha Mairang bad kumjuh ruh ban tuh ïa ki arshaka na kylleng ki bynta jong ka nongbah Shillong.
Katkum ka khubor na ki pulit la ong ba ka Kong Enjoymarlin Wahlang ka la ai ka jingujor ba ha ka miet jong ka 30 tarik Naiwieng, 2025, ki runar bym lah ban ithuh ki la ïoh ban prong tuh hapoh ka Mairang Presbyterian English Secondary School, Mairang Mission ha Eastern West Khasi Hills bad ban tuh ïa ka pisa kaba long T.6 lak.
Ha kawei pat ka khubor, ha ka step jong ka 2 tarik Nohprah, u Raymond Khongsit u la ujor tang da ka ktien ba ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AB-2320 na ka jaka sah ka jong u, kaba don ha Nongkynrih, Laitumkhrah, Shillong.
Kumjuh ruh ha ka step jong ka 2 tarik Nohprah, ki runar bym lah ban ithuh, ki la tuh ïa kawei ka arshaka kaba don ïa u registration number ML05-Z-0874 kaba dei trai da u Vikash Kumar Pandey na ka thaiñ Nongrim Hills, Laitumkhrah, Shillong.
Kumjuh ruh na ka liang jong u Yeomanlyson Suchiang u la ai ka jingujor ba ha ka 1 tarik mynta u bnai, ha ka por kumba 6.50 dang step, u la lap ba ka arshaka jong u, kaba don ïa u registration number ML04-D-2825 ka la jah na ka jaka ba pynïeng ha New Hill, Jowai, West Jaiñtia Hills.
