Shillong, Nohprah 03
Ka Meghalaya ka la lah ban pynpaw ïa ka jingtbit napdeng ki 22 tylli ki jylla jong ka ri India, hadien ba ki khynnah ïalehkai kiba hapoh 19 snem rta shynrang bnad kynthei ki la shim bynta ha ka 17th Micro Futsal Championship 2025 kaba la kut ha Karnal Singh Stadium, Delhi.
Ha kane ka lympung ba la pynïaid da ka Indian Soccer Futsal Federation, ka kynhun ki ‘thei ïaleh -kai ka Jylla ka la rah ïa ka nam lahduh, katba ka kynhun jong ki shynrang ka la wan ba-ar.
Ki khynnah kiba la mihkhmat ïa ka Jylla ki dei kiba pule ha ka Joel Gatphoh Memorial HSS, Nongkynjang, WKH, ba la ïalam da ka All Meghalaya Soccer Futsal Association.
Halor kane ka jingjop, la pdiang burom ïa ki rang bad ‘thei ïalehkai ha Umsning ha ka 1 tarik mynta u bnai ha kaba la sakhi lang da ki nongïalam bad ki paidbah.
Haba phai sha katei ka jingïakhun final jong ki shynrang, ka Meghalaya ka la shah rem noh ha ka Kerala da 3-2 kol. Katba ha ka liang ki kynthei, ka Meghalaya ka la pynliem ïa ka Assam da 3-0 kol.
Ki la don ar ngut ki khynnah kiba la ïohpdiang ïa ka khusnam Best Player kiba kynthup ïa u Namdisuk Rasmut uba na Jowai, West Jaiñtia Hills district bad ka Lawansuk Lyngkhoi na Nongstoiñ, West Khasi Hills district.
