Shillong, Nohprah 03
U nongïalam ka United Democratic Party (UDP), Bah Paul Lyngdoh u la kyntait ïa ki jingkynnoh halor ka jingthmu leit pynïasoh jong u sha ka National People’s Party (NPP), da kaba ong ba kine ki dei tang “ki jingmutdur bad ki jingpynwandur hi”.
“Ngam tip naei ka mih…kine baroh ki dei tang ki jingmutdur bad ki jingpynwandur hi,” la ong u Bah Lyngdoh da kaba ban jur ba um don jingthmu ban mih noh na ka UDP.
U Bah Lyngdoh u la pynpaw ruh ba ïa ki kam kiba ïadei hapoh jong ka seng, dei ban ïakren hapoh jong ka seng, da kaba kam ba ki don katto-katne ki bynta ki bym sngewhun ïa ka rukom leh haba ïadei bad ka jingbujli shuki Myntri (ba dang shen) da ki nongïalam ka seng.
“Hooid, ki don ki bynta bapher-bapher hapoh ka seng ki bym sngewtynnad ïa ka rukom leh jong ki nongïalam (ka seng) haba ïadei bad ka jingbujli shuki Myntri hynrei kine ki dei ki kam kiba ngi hap ïakren hapoh jong ka seng,” u la ong.
Shuh shuh utei u nongïalam ka UDP u la pynskhem ïa ka jingkular jong u sha ka seng, da kaba pynbna, “Nga pynskhem ha kawei ka bynta kaba long – ba ha baroh kawei ka jingim jong nga ha ki kam saiñ pyrthei, nga la ju long u nongïakhun bad ngam ju kynran dien. Ngan ym iehnoh da kaba suk kumta.”
