Shillong, Nohprah 03
U nongïalam ka Trinamool Congress (TMC) uba dei ruh u Myntri Rangbah barim ka Jylla, Dr. Mukul Sangma u la pynbna ba ka seng jong u kan ïashim bynta ha ka ilekshon ban wan sha ka Garo Hills Autonomous District Council (GHADC), da kaba khot bad wer ïa ki kyrtong kiba kwah bad don ka mon ban aplai na bynta ka jingthep kyrteng.
“Ngin sa don ïa ki kyrtong sha ka ilekshon GHADC bad ïa kito kiba kwah ban ïakhun kum ki kyrtong TMC yn khot ïa ki ban aplai na bynta ka jingthep kyrteng,” la ong u Dr. Mukul bad bynrap ba kane ka kam kan sa sdang noh shen.
U Dr. Mukul u la ban jur halor ka jingdonkam ban tei pynbha ïa ka GHADC bad ban pynïoh biang ïa ka jingsarong jong ka, da kaba pynpaw ba ka jinglong ba mynta jong katei ka shlem treikam ka long kaei-kaei kaba sngewkhia.
“Kumno ka GHADC ka la shah pynhiar sha kum kata ka tnad treikam kaba la ai daw na bynta ki paidbah ka Jylla ban phai khmat, hato kine ki bor kiba don ka jingkitkhlieh ïa ka jinglong-jingman ba mynta jong ka GHADC ki don da kawei pat ka jingthmu ka bym ïahap bad ka jingthmu jong ki paidbah,” u la ong.
U la ban jur ruh halor ka jingdonkam ïa baroh ki seng saiñ pyrthei ban sngewthuh ïa la ka jingkitkhlieh ha ka ban pynkhlaiñ ïa ki Autonomous District Council (ADC), khamtam ha kaba ïadei bad ka Khyrnit ba 6 jong ka Riti Synshar ka ri India.
“Ka dei ka kamram jong baroh ki seng saiñ pyrthei ban sngewthuh ïa ka jingkitkhlieh ban pynkhlaiñ ïa ka GHADC… ka jingsngew jong ka jingkitkhlieh ka i kumba ka ïaid lait na kata, lane ka ïaid lait na ngi namar ka jingbym don jong ka,” la bynrap biang u Dr. Mukul.
Shuh shuh une u nongïalam ka TMC u la ai dak ruh halor ka jingïateh lok (kaba lah ban don) bad ki seng kiba don kajuh ka jingmut-jingpyrkhat, da kaba pynpaw ba ki lah ban ïatreilang bad kiwei pat ki seng ha baroh 29 tylli ki konstitwensi ban kynjoh ïa ka thong jong ki ha ka ban tei pat ïa ka GHADC.
