Shillong, Nohprah 04
Ka Justice BP Katakey Committee ka la bthah ïa u Chief Secretary ban pynmih ïa ki jingbthah ban pyntikna ïa ka jingpynsangeh ïa ki kam tih dewïong be-aiñ ha East Jaiñtia Hills District.
Nalor kata, ka komiti ka la bthah ruh ïa u Deputy Commissioner ka distrik bad Superin-tendent of Police ban pynithuh ïa ki jaka ba lah ban don ka jingtih be-aiñ bad ban pynjur ïa ka jingpahara khnang ban khanglad ïa ka jingtih dewïong be-aiñ.
Kane ka la wan jia hadien ka jingujor ba dang shen na u nongmihkhmat ka VPP na Mawlai, Bah Brightstarwell Marbaniang pyrshah ïa ka jingtih dewïong be-aiñ kaba dang ïaid ha ka shnong Lumbangla.
Ka Justice B.P. Katakey Committee ha ka ‘Interim Report’ kaba 34 kaba la aiti sha ka Meghalaya High Court, ka la pynrem ïa ki bor distrik bad ki pulit ha East Jaiñtia Hills namar ka jingbym lah ban tehlakam ïa ka jingtih dewïong be-aiñ ha ka shnong Lumbangla, wat hapdeng ka jingkhang ka National Green Tribunal (NGT) ha u snem 2014 bad ka rai jong ka Supreme Court ha u snem 2019.
“Ka Komiti, haba pyrkhat ïa ka jingshisha ba ki kam tih dewïong be-aiñ ha East Jaiñtia Hills District ki long kiba bun, kaba dang ïaid mynta ruh, ka ai jingmut ban pynithuh ïa ki jaka /shnong ha kaba ki kam tih dewïong be-aiñ ki ju kham jia – da u Deputy Commissioner ha ryngkat ka jingïarap u Superintendent of Police ka distrik bad ban pynbun ïa ka jingpahara ha kito ki jaka ba la pynithuh man ka por,” ong u Katakey ha ka kaiphod jong u, da kaba bynrap “Dei ruh ban pahara ha baroh ki jingrung bad jingmih jong ki jaka ba la kdew, khnang ba ym lah ban kit shabar ïa u dewïong ba la tih be-aiñ na kito ki jaka/shnong.”
U la bthah ruh ba ïa kane ka jingpyntreikam ba la kdew donkam ban peit bniah hi da u Deputy Commissioner bad u Superintendent of Police, ki ban aiti ïa ka kaiphod ba bniah jong ki man la u bnai kynthup ïa ki sienjam ba la shim ban khanglad ïa ki kam tih dewïong be-aiñ kumjuh ruh ïa ki kam ba la leh, katkum ka aiñ, ha kino-kino ka jaka ba lap ïa ka jingtih dewïong be-aiñ, sha u Chief Secretary ne ki nongmihkhmat ba la ai bor jong u, ki ban ym dei hapoh ka kyrdan Additional Chief Secretary.
“U Chief Secretary/ Additional Chief Secretary un pynmih ïa ka jingbthah kaba donkam, na ka por sha ka por, ban pyntikna ïa ka jingpynsangeh ïa ki kam tih dewïong be-aiñ ha East Jaiñtia Hills District,” bynrap biang u Katakey.
Ka Katakey Committee ka la pynpaw ruh ïa ki jingbym biang ha ka jingpynrung ïa ka ejahar kaba ïadei bad ka jingtih dewïong be-aiñ ha ka shnong Lumbangla.
Katkum ka kaiphod jong ka komiti, la ïoh pdiang ïa ka ejahar ha ka 28 tarik Nailur, 2025, hynrei la pynngat mukotduma ha ka 6 tarik Risaw, 2025, kaba pynmih ïa ki jingartatien halor ka jingshisha jong ka jingpynskhem da u Officer-in-Charge ka Khliehriat Police Station.
Ka kaiphod ka pynpaw ruh ïa ka jingkurup tang ïa ar tylli ki jaka pynlang dewïong, watla ki don ki sabut halor ka jingtih kaba ïar bad ka jingdon jong ki tiar ki tar ha kata ka jaka.
Ka komiti ka la buh jingkylli ruh kumno ki pulit kim shym la lap ïa ka jaka tih dewïong be-aiñ bad ïa ki kam tih.
Shuh shuh ki jinglap jong ka komiti ki kdew ba katei ka par dewïong ka la treikam la slem, ha ryngkat ki pud ba la shna da ka dewbilat bad ki jaka theh dewïong kiba don kumba 2112 MT u dewïong ba la tih be-aiñ.
