Shillong, Nohprah 04
Ka Shillong Lajong FC bad ka Nongkseh SC ki la ïasam mar shi poiñ ha ka lympung ïalehkai SSA Champions Cup hadien ba ki la ïakhaid mar 1-1 kol ha ka sngi Palei ha SSA Stadium kaba ha First Ground, Polo.
Kane ka jingïakhun ka dei na ka bynta ka Group-B, kaba hangne ki ar kynhun ki la mih madan bad ki rangïalehkai ki la pyrshang ban ïalehkai bha bad haduh kaba kut ki 90 minit kane ka jingïakhun ka la long shisha kaba itynnad bad kaba ïakhaid bha.
Haba phai sha ka jingthep kol, ka Nongkseh kaba la ïoh ïa ka kabu ksiar ban pynkhih jar nyngkong lyngba u Kynsaibor Lhuid (67), ïa kaba ka Lajong ka la lah ban pynphai pat lyngba u Deibor-mame Tongper (76).
Kum ban shu pynkynmaw ba ka Nongkseh ka rung sha kane ka jingïakhun ryngkat bad ki 11 sien lynter ki nam jop kaba sdang naduh ka First Division bad ïai bteng haduh kane ka lympung jong ka Champions Cup, ha kaba ka la khmih lynti ban bteng ïa ka nam jop, hynrei ka la kut noh ha ka jingïakhaid. Te kumta kane ka kynhun hapoh ka jingïalam u Bah Richard Nongneng (coach) ka la buh jaka ïalade sha ka semi final.
Kumjuh ka Lajong, kaba la buh jaka lypa ïalade sha ka semi, kan dei ka sien kaba 15 sien lynter ba kan ïaid lyngba khlem da shah rem, naduh ba sdang ka Shillong Premier League, ka SSA Super Cup bad mynta ha kane ka Champion Cup, bad hynne ka janmiet kan dei ka sien ba nyngkong ïa kine ki ar kynhun ba kin shah thep ruh ki kol.
Hynrei shwa ïa kane ka jingïakhun, ka MLP F.T ka la lah ban pynliem ïa ka Mylliem Lum da 3-0 kol, ban nangpynskhem shuh shuh ïalade ban ïai neh ha ka kyrdan ba nyngkong ha ka Group-A.
Napdeng kine ki lai tylli ki kol, ar tylli na kine la thep ïa ki da u Chesterfield Nongdhar (3 & 54) bad sa shi kol la thep da u Balmingstar Lyngkhoi (36), ka ban pynlong ïa kane ka kynhun ban khur mynta 10 point.
Ka jingïalehkai ha ka sngi Thohdieng kan don tang kawei hapdeng ka Mawlynrei pyrshah ïa ka Laitkyrhong ha ka por 2:30 nohphai sngi.
