Shillong, Nohprah 04
Ka jingshah thok shah shukor pisa jong ki briew lyngba ki kor social media ka dang ïai bteng na kawei ka por sha kawei pat bad ïa kane lah ban sakhi ruh lyngba ki khubor kiba la paw dang ha kine ki sngi bad taïew ba la lah.
Katkum ka khubor ba la ïoh na ki pulit la ong ba kawei ka longkmie kaba dei ka nongshong shnong jong kawei na ki dong ka nongbah Shillong, ka la ai ka jingujor ba hapdeng ka 26 bad 27 tarik u Naiwieng, 2025, ka la buh ïa kawei ka ‘order’ na ka bynta ban thied 1 kilo u ‘Almond’ ha ka rynsan Facebook bad ha kane ka bynta ka la shah thok pisa ei haduh T.85,732/-.
Ha kawei pat ka khubor, kawei ka longkmie kaba dei ka nongshong shnong jong kawei na ki dong ka nongbah Shillong, ka la ai ka jingujor ba ha ka 19 tarik Risaw, 2025, ka la ïoh pdiang ïa ka ‘text message’ na Hana Jamdade ha ka rynsan ‘Telegram’ ha kaba la pynkohnguh ïa ka ban bei pisa ha ka ‘trading tasks’ da kaba pynbiej ba kan ïoh kham heh pat ka pisa. La ong ba hadien kane, ka nongujor ka la bei pisa haduh T.1.59 lak; hynrei kham hadien ka la sngewthuh ba ka la dep ban shah thok.
Ha kawei pat ka khubor, kawei ka longkmie kaba dei ka nongshong shnong jong kawei na ki dong ka nongbah Shillong ka la ai ka jingujor ba ha ka 15 tarik Naiwieng, uwei u briew ba la tip kyrteng kum u Sandeep Rawat, uba la kam ba u dei u ‘agent’ jong ka Army Public School, 101 Area, Shillong, u la pynlong ïa ka ban ngop ba kan ailut ïa ki jingtip ba ïadei bad ka Bank Account jong ka bad ha kaba ka la shah thok pisa haduh T.17,000/-, da kaba kular ban pynïoh kam ïa ka.
