Shillong, Nohprah 04
Ka Raid Mylliem ha ryngkat ki bakhraw batri jong ka Raid ha ka 4 tarik u Nohprah 2025, ki la pynlong ïa ka lehniam ïewduh kaba ki ju pynlong shisien ha ka shisnem kum shi bynta ban pynlong ïa ka kñia ka khriam ïa u syiar shynrang bad u blang shynrang ha ka jaka lehniam ba kyntang jong ka Hima kaba don ha khlieh ïewduh.
Kane ka jingpynlong ïa ka jingkñia syiar, kñia blang ka long shi bynta ban bha ka ïew ka basa jong ka Hima Mylliem.
U Myntri ne u Lyngdoh u ot ïa u syiar bad pom pyndkut ïa u blang shynrang ki ban long kum ki nongpynbha ïa ka ïew ka hat bad ka thied ka pet jong ka Raid ka Hima bad ba kin long ruh ki nongïada ïa u pud u sam jong ka Raid bad ka ïew na ki nongwei nongar ha kaba u Myntri u la leh ïa ka niam ka rukom.
Katei ka lehñiam jong ka Raid ka dei ba ki buh ka jingïada bad ïasaid ïa ka lei ïew lei hat jong ka Raid kaba ju leh naduh ki mynbarim bajah jong ka Raid bad ka Hima.
Haba kren sha ki lad pathai khubor u riew tymmen riewsan jong ka kur Nongkhlaw, u Bah Daming Nongkhlaw u la ïathuh ba ka jingkñia ïa u syiar bad u blang, ha kaba nyngkong ha kane ka sngi ka long kaba bha ba bit kumba la ïa pan la ïa ong.
U la ong, ha kaba ïadei bad u syiar uba ar, une u syiar u buh ïa ki dak ki shin khyndiat ba kam don ka jingïasngewthuh jingmut jong kita ki 3 kur Myntri, kata u Myntri Kharkongor, Myntri Sohtun bad u Myntri Kurkalang, namar dei hok ki Myntri ki ban leh ïa kane ka niam kaba mynta.
“Ki khun ki hajar baroh ki sngewsih jur ba kine ki Myntri kim leh shuh ïa ka niam bad ka Raid Mylliem,” la ong u Bah Daming Nongkhlaw.
“Kine ki Myntri ki ong ban nym leh shuh ïa ka niam hynrei ki kwah ban pynïaid hi bad leh hi ïa ka niam. Ki kwah rhah ki kwah bor, ha kaba dangsdang ki ong ban nym leh shuh ïa kata ka niam hynrei ynda la poi pat ha kane ka sop ka sur hapoh ïew ki kwah ka bor ban leh hi,” u la ong, da kaba bynrap shuh-shuh “Lada kita kiba arsap kiba thew kim pynïaid beit ïaid ryntih ïa ka synshar ka bishar kita kin sa lip hi bad kin dam hi”.
Haba ïa dei pat bad ka jinglehniam ïa u sñiang, u Bah Daming u ong ba un peit un khmih ïa kita kiba thombor, kiba ibeiñ bad kiba ñiewbeiñ ïa ki khun ki hajar ha kane ka lei ïew lane ïa kiba ieid kiba thoiñ.
Ha kane ka sngi la ïadonlang u Syiem khynnah Hima Mylliem, u Mansan Syiem, u Myntri Kharlukhi, u Myntri War Tynghah, nalor kiwei-kiwei de.
