Shillong, Nohprah 04
U Sarwagya Singh Kushwaha na India u la kylla long u rangïalehkai ba dangrit tam ha ka histori jong ka jingïalehkai chess ban ïoh ïa ka kyrdan ‘FIDE rating’ ha ka rta kaba lai snem, hynñiew bnai bad 20 sngi.
U Kushwaha, uba na Sagar district ha Madhya Pradesh, u la pynkheiñ ïa ka rekod kaba la ju bat mynshwa da u Anish Sarkar na Kolkata, uba la ïoh ïa kane ka thong ha u Naiwieng jong u snem ba la lah, ha ka rta kaba lai snem, 8 bnai bad 19 sngi.
Mynta u Kushwaha uba la rung ha ka shlem ai jinghikai skul, u la lah ban kamai 1,572.
“Ka long ka jingsarong bad burom kaba khraw ïa ngi ba u khun jong ngi u la long u nongïalehkai chess uba dangrit tam ha ka pyrthei ban ïoh ïa ka kyrdan FIDE. Ngi kwah ba un long u nongïalehkai ba paw,” la ong kpa jong u Kushwaha, u Siddharth Singh ha ka tnad pathai khubor.
Ban ïoh ïa ka kyrdan ha ka FIDE, ki nongïalehkai ki donkam ban pynliem ïa ki nongïalehkai nabar ri.
Une u heprit u la jop ïa lai ngut kiwei kine ki nongïalehkai ha ki jingïalehkai ha kylleng ka Madhya Pradesh bad kiwei kiwei ki bynta jong ka ri, kaba la pynskhem ïa ka kyrdan jong u ban pynkheiñ ïa ka rekod.
