Washington, Nohprah:
U Myntri kam bar ri jong ka Turkey, u Hakan Fidan bad u Secretary General ka NATO, u Mark Rutte, ki la iakren halor ka jingshngaiñ ha ka Black Sea, ha ka Sngi Balang, ong ka tyllong khubor jong ka tnat kam bar ri jong ka Turkey, hadien ba ka Ankara, ka la pynpaw ia ka jingsyier halor ki jingshah thombor ki jhad kit umphniang kiba don jingiadei bad ka Russia, kiba don kiba la kam da ka Ukraine.
Ka Ankara, ka dei ka dkhot jong ka kynhun NATO kaba la bat ia ka jingiadei kaba jan bad baroh arliang ha ka thma jong ka Russia ha Ukraine, ka la pynrem ia ki jingthombor ia ki jhad kiba don jingiadei bad ka Moscow kiba la jia hapoh ka jaka kamai kyrpang jong ka Turkey ha rud duriaw jong ka ha ka Duriaw Basaw.
Kitei ki jingshah thombor, ki la pynlong ïa ka dor insurance jong ki lieng jong ka Black Sea, ban kham heh bad pynlong ïa kawei ka kompeni jong ka Turkey, ka Besiktas Shipping, ban pynsangeh ïa ki kam kiba ïadei bad ka Russia, namar ka jingeh ha ka liang ka jingshngaiñ.
Ka Ukraine, kaba thmu ïa ka jingshalan umphniang jong ka Russia, katba ka Moscow, ka dang pynbthei bom ïa ka bor ding jong ka, ka la shim ïa ka jingkitkhlieh, halor ka jingshah thombor jong ki drone, ha duriaw, ha ki ar tylli ki jhad kit umphniang, kiba leit sha kawei ka kad lieng jong ka Russia, ha ka taiew ba ladep.
Ka Kyiv, ka la kyntait ba ka don kano kano ka jingiadei bad kawei pat ka jingjia, ha ka sngi thohdieng, ha kaba kawei ka jhad kit umphniang, kaba don ia ka lama Russia, kaba la kit ia ka umphniang sngi, ka la ong ba ka la shah thombor ha ki drone ha rud duriaw jong ka Turkey. Sha lyndet jong ka thaiñ Black Sea, kawei ka jhad kit mar jong ka Besiktas Shipping kaba ïatreilang ruh bad ka Russia ka la shah pynjulor hajan ka Senegal na ka jingshah ktah na shabar. Ym don ba shim ia ka jingkitkhlieh.
U Fidan bad u Rutte, ha marjan jong ka jingïalang jong ka NATO ha Brussels, ki la ïakren ïa ki mat kiba ïadei bad ka jingïada ïa ka Black Sea bad ki jingïakren ban pynkut noh ïa ka thma kaba la jan saw snem, la ong ka tyllong khubor jong ka tnat kam bar ri jong ka Turkey, khlem da ai jingtip shuh.
Ka Turkey ka la khot ia ki jingshah thombor ha ki liengsuin ki bym lah ban pdiang bad ka la maham ia “baroh ki liang” ban pynsangeh noh ia ki. U heh jong ka Turkey u la ong ba kane ka kynthup kyrpang ïa ki bor synshar jong ka Ukraine.
U President ka Russia, U Vladimir Putin, ula jubab da kaba byrngem ban khanglad ïa ka lynti ïaid jong ka Ukraine sha duriaw, bad ong ba ka Moscow, kan pynjur ïa ki jinghiar thma ïa ki jaka treikam bad ki jhad jong ka Ukraine bad kan ïaid pyrshah ïa ki jhad kit umphniang jong ki ri kiba ïarap ïa ka Ukraine.
Ka jingthmu ia ki jhad khaii ha ka jaka ba kyrpang jong ka ioh ka kot jong ka Turkey ka pyni ia ka jingjur jong ka thma ha Ukraine, ong u Ayhan Zeytinoglu, u chairman jong ka tnad pynroi ia ka ioh ka kot jong ka Turkey, ha ka jingialang ha Istanbul ha ka sngi thohdieng, kaba la pynlong lang da ka tnad treikam jong ka Poland.
Ha kaba kyrpang, U President Tayyip Erdogan, u la iathuh ha U President jong ka France, U Emmanuel Macron, ha ka jingkhot, ba ka Turkey, ka pyrshang ban pynim biang ia ka jingiakren sangeh iasiat hapdeng ka Ukraine bad ka Russia, ha Istanbul, katkum ka jingpule na ka ophis treikam jongu.
