Shillong, Nohprah 04
Ka Hill State People’s Democratic Party (HSPDP) ka la ban biang ïa ka jingpyrshah jur jong ka haba ïadei bad ka jingtih ‘Uranium’ ha Meghalaya da kaba kdew ïa ka jingsngewkhia halor ka mariang bad ka imlang-sahlang.
Haba kren sha ki lad pathai khubor ha ka Sngi Palei, u President ka HSPDP, Bah K.P. Pangniang u la ban jur halor ka jingïeng skhem (ba la slem) jong ka seng ban pyrshah ïa ka jingtih ‘Uranium’, da kaba ong, “Ngi kwah ban pynkynmaw ïa ki nongshong shnong ka Jylla bad ka Sorkar ba ka HSPDP da kaba tyngeh bad kaba skhem ka ong em ïa ka jingtih ‘Uranium’ ha Meghalaya.”
U Bah Pangniang u la pynpaw ïa ka jingïaipyrshah jong ka seng haba phai sha ka jingtih ‘Uranium’ da kaba kdew ïa ka jingïohi jngai jong u nongseng – Bah Hoping Stone Lyngdoh.
“Naduh ba la pynkha ïa ka, ka seng jong ngi ka la ïeng skhem bad tyllilang ban pyrshah ïa kino-kino ki kam tih marpoh khyndew ne jingwad bniah ha Meghalaya,” u la ong.
Shuh shuh une u nongïalam ka HSPDP, u la pynkynmaw ïa ka rai jong ka Sorkar Meghalaya ha u snem 2016, hapoh ka jingïalam u Dr. Mukul Sangma, ban sangeh ïa ka jingtih ‘Uranium’, hadien ka dorkhast ba la aiti da ka seng.
“Ngi ïeng ha kata ka rai bad ngi kyntu ïa ka Sorkar ba mynta ban pynneh ïa ka,” ong u Bah Pangniang.
“To ngin ïeng skhem halor ka rai ba la shim da ka Sorkar barim ban ym wad bniah ne tih ‘Uranium’ ha Meghalaya,” u la bynrap.
