Shillong, Nohprah 04
Ka Commissioner for Persons With Disabilities jong ka Sorkar Jylla ha ka jingïatreilang bad ka State Resource Centre on Disability Affairs Shillong (SRCDA) ha ka sngi Balang ka la pynlong ïa ka EmpowerFest 3.0, ban rakhe ïa ka International Day of Persons with Disabilities.
Ha kane ka sngi u Myntri Rangbah ka Jylla u Conrad Sangma u la long kum u kongsan ha kaba la synranlang da u nongaibuit ka tnad Social Welfare u Bah Paul Lyngdoh uba long kum u Symbud Kongsan.
U Myntri Rangbah haba kren ha ka jingïalang u la ong ba la sdang ïa ka EmpowerFest lai snem mynshwa, bad kane ka prokram la ïohi ba ka la nangkiew bad ka long ka jingleh kaba don jingmut bha.
U la pynpaw ba kane ka prokram ka thmu ban pynkylla ïa ka rukom pyrkhat bad ki jingai jingïarap sha kiba dei hok. U la pyntip ruh ba ka Sorkar Jylla ka la ithuh ïa ki 30 ngut ki nongsengkam ba don hapdeng ka jingduna ha ki dkhot met bad ka ju kyrshan ïa ki Common Service Center (CSC) ba la pynïaid da ki briew ba don jingduna dkhot met bad kane ka dei kaba nyngkong eh ha ka thaiñ Shatei Lam-Mihngi.
Nalor kata u la pynkynmaw ïa ka jingkular ka Sorkar ba kan kyrshan bad don ryngkat bad kiba ïakynduh jingeh, ha kaba ka dang plie lad plie lynti ïa ki. U la ong ba ka jinglah jong kiba don jingduna ha ki dkhot met ban ïaishah ka long kum ka jingaimynsiem ïa kiba bun.
Ha kane ka jingïalang u Myntri Rangbah u la pynkup burom ruh ïa ki katto katne ngut kiba duna dkhot met kiba la wanrah nam bad wanrah khusnam sha ka Jylla ha ki liang ba bun, kumjuh kiba la jop ha ki jingïakop bapher-bapher ba la pynïaid da ka tnad.
Ha kane ka jingïalang la pynlong ïa ki jinghikai pynsngewthuh bad ki jingïaphylliew jingmut bad ki jingpyni ïa ki rukom pynwandur kum shibynta ban pyni ïa ka sap bad ki jingjop jong ki briew ba don jingduna ha ki dkhot met.
