Shillong, Nohprah 04
U Chairman-cum-Managing Director jong ka Meghalaya Energy Corporation Limited (MeECL) u Sanjay Goyal ha ka sngi Palei u la pynshai ba ka jingpynlip bording khari-khari hapoh ka Jylla ka dei namar ki kam maramot ym ba pyntreikam ïa ka ‘load shedding’.
Haba kren sha ki lad pathai khubor, u Goyal u la ong, “Donkam ban hap pynlip ïa ka bording, ngi la pyntrei shibun ki kam hapoh ka RDSS bad kiwei ki skhim ban pynheh ïa ki laiñ. Ym lah satia ban leh haba don ding, ngi la pynmih ïa ki jingpyntip man ka sngi ha ki kot khubor”.
U Goyal u la batai ba ka jingpynlip bording ka long kaba donkam ban maramot bad pynkhlaiñ ïa ki jingdon jingem bad ki jingtei bording, haba bynrap “Dei tang kane hi ka aiom kaba ngi lah ban trei. Kan dang ïai bteng ha ki katto katne ki shnong ha la ki jong ki jong ki tarik”.
U la ban jur ba ym pat pyntreikam satia ïa ka ‘load shedding’ haba bynrap “Kane kam dei ka ‘load shedding’. Ka jingpynlip bording ka lah ban dei namar kiwei ki daw kum ka jingkem ding ki meter, bad ngi hap ban ot ïa ka laiñ bad weng ïa ki waiar”.
U Goyal u la kyntu ïa ki nongshong shnong ba kin ïai shah bad kane ka jinglip bording bad ong “Phi hap ban ai ka por ïa ka MeECL ba kan maramot bad pynkhlaiñ ïa ka laiñ. Ïa u soh phin sa ïohi hadien shisnem haba khie ka lyer ba jur bad kan nym don satia ka jinglip bording”.
Ka MeECL kala pyntrei ïa shibun ki kam kynthup ka jingpyndait sa 2500 tylli ki transformer, 4500 km ka laiñ thymmai bad bujli ïa 1000 km ki waiar.
U Goyal u la kular ba ka tnad kan pyrshang ban pynduna ïa ka jingpynlip bording khamtam ha ka por ba long eksam.
