Washington, Nohprah:
U State Secretary jong ka US, u Marco Rubio, ha ka Sngi Balang u la maham ia ka jingma jong ki kynhun lehnoh Islam, naba u la ong ba kitei ki jaitbynriew ki kwah ban ioh synshar hi ia ka pyrthei baroh kawei bad ki long ka jingma kaba khraw ia ka pyrthei khamtam ha kum kine ki sngi ba kat sha ba phai, la ap sa tang da ki thma bad ki jingiapher jingmut para marjan ri.
Ha kajuh ka por u la ong ba ka US kan pyrkhing noh ia ka rukom sam Visa sha kito ki seng lane ki kynhun kiba ju bei tyngka sha ki kam thombor pyrshah ia ki riewngeit Khristan hapoh Nigeria bad ha kylleng ki ri jong ka pyrthei.
Ha ka jingiakren bad ki nongthoh khubor, u Rubio u la ong ba ka US ka iakynduh ia ka jingma kaba khraw tam na ki kynhun jaitbynriew Islam kiba shyrkhei, kiba u ngeit ba ki kheiñ ia katei ka ri kum “ka tynrai ba kongsan jong ka jingsniew ha ka pyrthei”.
“Ka jaitbynriew Islam kaba ratbah, ka la pyni ba ka jingkwah jongki, kam dei tang ban bat ia kawei ka bynta jong ka pyrthei bad ban sngewbha bad la ka jong ka hima barit jongki; hynrei ki kwah ban pyniar shuh shuh ruh sha kylleng ka pyrthei baroh kawei.
“Kata ka dei ka jingma kaba khraw ia ka pyrthei bad ia ka ri Sepngi kaba kham heh, hynrei khamtam eh ia ka ri America, kaba ki ñiew ia ki kum ka tynrai ba kongsan jong ka jingsniew ha ka pyrthei,” u la bynrap.
U Rubio u la ong shuh shuh ba ki kynhun lehnoh Islam kiba shyrkhei ki “pynkhreh ban pyn urlong ia ki kam thombor jong ki lehnoh, ki kam pyniap briew dusmon” ba kin ioh ban synshar hi hapoh ka imlang sahlang bad ha ki liang baroh.
Kaei kaba donkam na ka bynta jong ki ban ïoh ïa ka jingsynshar jong ki bad ha kaba kut ka jingsynshar jongki, ïa ki kolshor bad ki imlang sahlang bapher bapher, la ong u Rubio haba iakren bad kitei ki nongthoh khubor ka Fox News.
Nalor kata, u Marco Rubio u la pynbna ba ka US kan pyrkhing noh ia ka rukom sam Visa sha kito kiba la paw pyrthei halor ka jingbei tyngka ne ka jingai jingkyrshan lane kiba don kti ha ki kam thombor pyrshah ia ki jaitbynriew Khristan ha Nigeria bad ha kylleng jong ka pyrthei.
Kham mynshwa, u President jong ka America, U Donald Trump, u la maham ba ka Washington, ka lah ban pyni da ka bor ki shipai jongka, pyrshah ia ka Nigeria, da kaba kam ba ki Khristan jong katei ka ri, ki shah thombor bad shah pyniap dusmon ha kitei ki lehnoh Islam. Ki jingkren jong u ki la ioh jingkyrshan na ki katto katne ki sur ha ki kynhun Khristan kiba don ha ka liang ka diang bad ki kynhun Khristan kiba ialap ia ka Gospel ha US.
Ha ka jingthoh ha ka rynsan ‘Social Media’ ha ka Sngi Ba-ar, u Secretary ka tnat ïada ri jong ka US, u Pete Hegseth, u la ïathuh ba u la ïakynduh ïa u Nongaibuit ïada ri jong ka Nigeria, u Nuhu Ribadu bad ka kynhun jong u ha ka sngi ba la dep. U la ong ba ka jingiakren jongki, ka long beit halor kaei kaba u la batai kum ka jingshah thombor kaba shyrkhei pyrshah ia ki Khristan ha ka ri jong ki.
