Shillong, Nohprah 04
Ki pulit ka Anti Narcotics Task Force (ANTF) ha ka janmiet jong ka 4 tarik Nohprah, 2025, ki la leit ban kyndang ïa kawei ka ïing ha Lum Survey bad ha ka jingkhynra ki la ïoh ban kurup ïa u drok na kane ka ïing.
Kane ka jingleit khynra ki pulit ANTF ha katei ka jaka ka dei hadien ba ka la ïoh jingtip ïa ka jingdon jong u drok bad mar-mar ki la hiar sha Lum Survey bad kem ïa uwei u briew.
Hadien ka jingtohkit ïa une u briew u la ïalam sha ïingsah jong u bad hadien ka jingkhynra, ki pulit ANTF ki la ïoh ban kurup ïa 40 tylli ki tyndong thep drok ha ryngkat u drok bad ar tylli ki synduk buh Sabon. Une u drok u don ïa ka jingkhia kumba 25.45 gram.
Halor katei ka jingjia ki pulit ki dang pynlong ïa ka jingtohkit ban lap shuh-shuh ïa kiba donkti ha kane ka kam bad ïa utei u briew uba dei u bar jylla, ki pulit ki la rah noh sha thanad.
