Shillong, Nohprah 04
U MLA ka Voice of the People Party na Nongkrem konstitwensi u Bah Ardent M Basaiawmoit u la tyrwa ïa ki artylli ki skhim hapoh ka District Mineral Fund sha u Myntri Rangbah ka Jylla u Conrad K Sangma bad kyrpad ban ai jingmynjur noh ïa ki projek jingtei ba la donkam kyrkieh hapoh ka konstitwensi jong u.
Kine ki skhim ki kynthup ïa ka jingshna ïa ka jingkieng ïaid kali ba pynïasoh ïa ka surok shnong bad ka Presbyterian Secondary School Umphyrnai kaba don ha Umphyrnai Rngi, bad kawei pat ka jingkieng kaba don ha Madan Umjaut, Pomlakrai Rngi Shyllong, ha kaba ka jinglut kan poi mar T.25 lak kawei ka jingkieng.
Ha ka jingthoh u Bah Ardent u la ban jur ïa u Myntri Rangbah, ïa ka jingdonkam ban shimkhia kyrkieh ïa kine ki jingkieng, khnang ban lah ban pynthikna ïa ka jingshngaiñ ka ïaid ka ïeng jong ki nongshong shnong bad ki khynnah skul.
“Nga kyrpad rit ïa phi ban mang pisa lem ïa kine ki skhim kham kloi katba lah.” la ong u Bah Ardent ha ka jingthoh.
