Shillong, Nohprah 04
Ki bor pynïaid district ka East Khasi Hills ki la pynmih ïa ka hukum ban pynjari ïa ka kyndon 163 BNSS, kaba mana tyngeh ban thang ïa ki khlaw kiba hap ha ka district.
Kane ka jingpynmih ïa ka hukum ka dei ban tehlakam ba kan ym don ka jingpur ding ha ki khlaw ki btap bad ban ïada ïa ka mariang, ïa ka jingshngaiñ ki paidbah bad ïa ka jingim briew.
Katkum ka hukum kaba la pynmih da ka district magistrate, Kong RM Kurbah ha ka sngi Palei, kala pynpaw ba kila don ki jingpyrshang khnang bad kala jur ruh ka jingthang khnang ïa ki khlaw kaba la lam sha ka jingpur ding ha ki khlaw bad lam sha ka jingpynjulor ïa ka mariang.
Kane ka jingkhang pyrshah kan treikam noh mardor bad kan bteng ban treikam tad haduh ban da pynbna da kumwei pat.
Kino-kino kiba pynkheiñ kin shah pynshitom hapoh jong ka kyndon 223 jong ka BNSS.
Kane ka jingmana ka dei shi bynta ban ïaleh ban ïada ïa ki jingdon jingem ha ka thaiñ bad ban ïada na kino-kino ki jingjulor.
La kyntu ïa ki paidbah ba kin ai ka jingïatreilang bad ki bor district kila maham ba kino-kino kiba pynkheiñ kin shah pynshitom da kaba tyngeh.
