Shillong, Nohprah 04
U Myntri Sorkar Pdeng ka tnad Communications bad Development of North Eastern Region (DoNER), u Jyotiraditya M. Scindia u la ong ba ïa ka Sohra Circuit ha Meghalaya bad ka Matabari Circuit ha Tripura la shim ïa ki kum ki ‘Pilot Basis’.
Ïa u mawnongrim jong ka Meghalaya-Sohra Circuit la dep ban buh, katba ïa ka Tripura-Matabari Circuit ka la don ha ka kyrdan ba shakhmat ban ïoh ïa ka jingmynjur, u la ong haba pynïaid ïa ka Consultative Committee jong ka tnad DoNER ha Parliament House Annexe ha ka 3 tarik Nohprah.
Nalor ka jingpynkhlaiñ ïa ki jingtei, ka projek ‘Tourist Circuit’ kan don ruh ïa ka jingpynleit jingmut kaba khlaiñ ha ka ban tei ïa ka jingpyntbit ban pyntikna ïa ka jingdon jong ki briew kiba tbit ban kyrshan ïa ka jingroi ha ka kam jngohkai pyrthei bad na ka bynta ka jingshem kaba kham bha sha ki nongjngohkai pyrthei, u la bynrap.
Hashuwa, u Scindia u la pdiang sngewbha ïa ki dkhot jong ka komiti na Lok Sabha bad Rajya Sabha bad pynpaw ba ki jingïalang jong ka Komiti ki long ka bynta kaba kongsan jong ka jingïakren kaba ïai bteng halor ka jingbei tyngka bad ka jingïaid shakhmat ha ka roi ka par ha ki Jylla ka Thaiñ Shatei Lam Mihngi.
Ha kajuh ka por, u la ai khublei ruh ïa ki dkhot na bynta ki jingïashim bynta shitrhem bad ki jingshemphang kiba kordor ha ki jingïalang jong ka Consultative Committee.
Da kaba khot ïa ka PM-DevINE kum ka skhim kaba kongsan tam jong ka tnad, u Scindia u la pyntip ba ïa kane ka skhim la pynwandur ha ka Mang Tyngka ka Sorkar Pdeng na bynta u snem 2022-2023.
Ka skhim ka don ïa ka jingmang kaba T.6600 klur na ka bynta ka samoi 2022-2023 haduh 2025-2026. Haduh ka 31 tarik u Risaw, 2025, la mang haduh 44 tylli ki projek kiba shongdor kumba T.5,700 klur. Lai tylli na ki projek ba la dep mang kiba shongdor kumba T.176 klur la lah ban pyndep katba 41 tylli kiwei pat ki projek kiba shongdor kumba T.5,500 klur ki dang ïaid mynta.
Kumjuh, ïa ki projek kiba shongdor T.111 klur la dep ban mynjur, lem bad kiwei pat ki projek kiba shongdor T.625 klur ki dang don ha ka jingpynkhreh. Kumta ka tnad ka don ha ka lynti ban pyndonkam pura ïa ka jingmang jong ka skhim.
Haba jubab halor ki mat ba la wanrah da ki dkhot ka Committee, u Myntri u la ai ïa ki jingtip kiba bniah halor ki projek kiba dang pyntreikam ha Assam, Nagaland, Mizoram bad Tripura. Halor ka jingai jingmut na ka bynta ki projek ka tnad kam jngohkai pyrthei ha Tripura, u Myntri u la pyntip ba yn wanrah ïa ki ‘Tourist Circuit’ ha ryngkat ki jingdonkam katkum ka kyrdan ha ka pyrthei ha man ki Jylla ka Thaiñ Shatei Lam Mihngi, ha ki jaka ba la jied bad ba la pynithuh da kaba ïamir jingmut lang bad ki Sorkar Jylla.
Shuh shuh u Scindia u la pynpaw ba ïa ki projek PM-DevINE la buddien lyngba ka rukom treikam kaba bniah bad ba bun syrtap.
Na ka liang ki ophisar ka MDoNER & North Eastern Council (NEC) ki la pynlong ruh ïa ki jingjurip ha ki jaka, ba la ïarap shuh da ki rukom treikam ‘third-party assessment’ ban pyntikna ïa ka jingkitkhlieh.
