Washington, Nohprah:
Katkum ki khubor, La pynrung ia ka kyrteng jong u President ka US- u Donald Trump, hapoh ka jingthoh jong kawei ka jakapule ‘United States Institute of Peace’ kaba don hapoh ka nongbah Washington, ia kaba la khmih lynti ba un pdiang sngewbha ia ki President jong ka Rwanda bad ka Democratic Republic of Congo ha ka Sngi Palei na ka bynta ban ia soi ia ka soskular iasuk kaba la pyniasoh da ka US.
Katei ka sienjam, ka long hadien ba ka sorkar jong u Trump, ka la pyrshang ban shimti ia ka Institute of Peace, ha kaba sdang jong une u snem.
Ka bor synshar ka la weng noh ïa ki nongtrei bad ka la buh ïa la ka jong ka nongïalam shwa ba u nongbishar jong ka sorkar pdeng un pynbna ba kita ki kam ki long kiba be-aiñ, da kaba khot ïa katei ka jingpyrshang jong u Trump kum ka “jingshim kabu da ka bor.” Kane ka seng bym donkam kamai, kaba la bei tyngka da ka Congress jong ka US, ka la treikam ha ka rukom bat naduh katei ka por.
Haba la kylli halor ka rai ban pynitynnad ïa katei ka iing da ka kyrteng jong u President, ka nongkren jong ka White House, ka Anna Kelly, ka la iathuh ba ia ka U.S. Institute of Peace, la ai nam noh ha ka kyrteng jong u President ka ri hi.
“Mynta, ka Donald J. Trump Institute jong ka jingsuk, kaba la ai kyrteng da kaba itynnad bad kaba biang tam na ka kyrteng jong u President uba la pynkut noh ïa ki 8 tylli ki thma hapoh ka shi snem, kan ieng kum ka jingpynkynmaw kaba khlaiñ ïa kaei kaba ki nongïalam kiba khlaiñ ki lah ban pyndep na ka bynta ka jingshong suk shongsaiñ ha ka pyrthei. Khublei shibun, ka pyrthei!” ka la ong.
Kane ka jingpynbna ba u Trump u la pynkut noh ia ki 8 tylli ki thma mynta u snem ka long ka mat kaba la shit rhem bha ha kine ki sngi bad bun ruh kiba pyrshah ia kane. Ka dang don shibun ka kam shwa ba kiba bun ki jingïakynad kiba u President u kam, ba ki la kut, kynthup ïa ka jingïakynad hapdeng ka Israel bad ka Hamas.
Hynrei la ong ba katei ka jaka pule kam shym la jubab ia ka jingkylli ban ioh jingtip kham shai haba iadei bad kane ka jingpynkylla kyrteng ha kane ka sien.
Ka kynhun lehnoh M23, kaba la kyrshan da ka Rwanda, ka la pynlong ia ka jinghiar thma kaba stet ha ka thaiñ Mihngi jong ka Congo, mynta u snem, ha kaba ka la kurup ia ki ar tylli ki nongbah kiba heh tam jong katei ka thain bad ka la pynmih ia ka jingtieng ia ka thma kaba kham heh.
Katei ka jingiakren iasuk kaba la lam khmat da ka US ka la sdang ban ïaid kam ha u bnai Jylliew jong une u snem 2025.
