Shillong, Nohprah 04
Ka Shillong Cricket Association (SCA) ka la pynpaw ka jingpyrshah jur ïa ka General Election 2025 jong ka Meghalaya Cricket Association (MCA) bad ka la dawa ïa u Electoral Officer ban pynbna ïa kane ka rukom pynïaid kum ka bym treikam satia haba kdew ïa kiba bun ki jingleh bakla bad jingpynkheiñ ïa ki kyndon ilekshon ba la pruid dak da ka BCCI bad ka riti treikam ka MCA.
Kat kum ka kyrwoh ba pynmih ha ka sngi Palei, ka SCA ka la niew ïa kane ka ilekshon kum kaba don bun ki jingduna bad ka bym lah ïada kat kum ka riti treikam, haba kdew ïa ki jingleh kum ka jingpyrshang ban khang ïashim bynta ïa ki nongthep vote, ka jingailad ban ïa ujor lem bad ka jingduna ka por ban ïalap ilekshon.
Katei ka synjuk ka la dawa ïa u Electoral Officer ban kheiñ ïa kane ka ilekshon kum ka bym treikam satia bad ban pynlong thymmai biang da kawei ka ilekshon. “Ka ilekshon ba dangïaid jong ka MCA kam dei ka kam ba leh ïa ka jingbakla barit hynrei ka jingpyrshang ban pynkylla khongpong ïa ka jingmih, kaba pynïap ïa ka ilekshon kaba laitluid bad ka bym shah liang, bad kaba pynduh ïa ka jingshaniah ha ka rukom pynïaid ïa ka kriket ha Jylla” la bynrap ka SCA.
Te kumta ka SCA ka la kdew ruh ba ka MCA ka la pyllait tang ïa ka thup ki dkhot jong ki synjuk khlem da pynpaw pat ïa ki kyrteng jong ki nongmihkhmat jong ki, kaba pynbor ïa ki kyrtong ban thep kyrteng khlem da tip ïa ka jingdon ki nongthep vote jong ki. Ïa ka kyrteng jong ki nongmihkhmat la thep tang ha ka website ka MCA hadien ba kut ka jingthep kyrteng ki kyrtong.
Na ka liang ka Deputy Commissioner ka la shim khia ïa ka jingdon bun ki jingpynkheiñ ïa ki kyndon ha ka jingpynïaid ïa ka elekshon ka MCA bad ka la hukum ban tohkit ïa ka rukom pynïaid ïa ka General Election 2025 jong ka MCA.
Shuh shuh ka SCA ka la dawa ba u Electoral Officer u dei ban pynlong biang da kawei ïa ka ilekshon ha ryngkat ka jingphah kyrteng ïa ki nongmihkhmat, ban pynmih ïa ka thup ki nongthep vote bad ka kyrteng, ka por ban ujor kaba dei hok, ban pynbna shai ba ka jingthep vote bad jingpynbna ïa ka result kan long ha shlem treikam ka MCA ha Shillong.
