New Delhi, Nohprah:
Ki la don palat 5,000 ngut ki kynthei ki la shah pynrung ha ka kynhun lehnoh Jaish-e-Mohammed, kaba dang shu sdang thymmai, ka Jamaat ul Mominaat, bad ki jingpyrshang ban pynlong riewkhlaw ïa ki, ki dang ïaid shakhmat, ong ki tyllong khubor na ka tnad pahara. Ha ka jingthoh ha ka Social Media, u heh jong ka Jaish, u Masood Azhar, u la ong ba ka jingdon jong ki nongtrei ha ka kynhun lehnoh jong ki kynthei, ka la nang kiew, bad ka don ka jingdonkam ban thaw ïa ki distrik unit mynta.
“Ka dei ka jingaiei jong u Allah ba tang hapoh khyndiat taïew, palat 5,000 ngut ki kynthei ki la ïasoh. Bun ki para kynthei ki la ong ba tang shu shah thung kam, ka jinglong jingman jong ki ka la kylla bad ki la sngewthuh ïa ka thong jong ka jingim.
Yn thaw ïa ki unit jong ka distrik, man la ka distrik kan don ïa ka Muntazima (nongpynïaid ïa ka jingim), bad ka por kan don hajar ngut, la ong u Azhar ha ka jingphah khubor.
Katkum ki tyllong khubor ba la ïohlum, la ong ba ka jingpynrung kam ïa ka Jamaat ul Mominaat ka la sdang naduh ka 8 tarik Risaw ha ka jaka treikam jong ka Jaish, Markaz Usman-o-Ali. Kum shi bynta jong kane ka jingpynkhreh, la pynrung ïa ki kynthei na Pakistan ha Bahawalpur, Multan, Sialkot, Karachi, Muzaffarabad bad Kotli sha kane ka kynhun lehnoh.
Ka para jong u Masood Azhar, ka Sadia, ka pynïaid ïa ka Jamaat ul Mominaat. U tnga jong ka Sadia, u Yusuf Azhar, u la shah pynïap ha ka por ba ka India, ka la pynlong ïa ka Operation Sindoor bad ka la thombor ïa ki ktem jong ki lehnoh ha Pakistan ban pynphai kylla ïa ka jingthombor jong ki lehnoh ha Pahalgam, kaba la shim ïa 26 ngut ki mynsiem ba lui lui. Kawei pat ka khmat ba kongsan jong ka kynhun lehnoh ka dei ka Afira, ka kurim jong u nonglamkhmat halor ka kam thombor ha Pulwama, u Umar Farooq, uba la shah pynïap ha ka jingïasiat.
Ki tyllong khubor ki ïathuh ba ki kynthei ki shah pynrung ha ka Jamaat ul Mominaat bad shah hikai Online.
Kine ki Online Class ki long 40 minit bad man uwei pa uwei u nongïashim bynta u hap ban siew T.500. Ka jingthmu ka long ban pynlong ïa ki kynthei bad ban thaw ïa ki kynhun lehnoh ban pynlong ïa ki kam thombor Fidayeen kum ki ISIS, Hamas bad LTTE.
Ka Jamaat Ul Mominaat ka la wan ha ka jingshai hadien ka jingbthei bom ha kali ha Delhi ha u bnai ba la lah kaba la pynlong ïa 13 ngut ki briew ban ïap. Ka Dr Shaheen Saeed, kaba la shah kem hadien ba la lap shibun ki tiar pynbthei na Faridabad hajan Delhi, ka don ka jingïadei bad ka kynhun lehnoh jong ka Jaish, la lap da ki nongtohkit.
Kham mynshwa, haba la pynmih ïa katei ka kynhun, u Azhar u la ong ba ïa ki dkhot jong ka kynhun kynthei yn hikai kum ki shynrang ba la pynrung kam jong ka Jaish. U la ong ba kumba ki samla shynrang ki ïaid lyngba ïa ka jinghikai “Daura-e-Tarbiat” kaba 15 sngi, ki kynthei kiba rung sha ka Jamaat-ul-Mominaat kin long shi bynta jong ka jinghikai pynrung kam kaba la khot “Daura-e-Taskiya”. Ïa kane ka jinghikai yn pynlong ha Markaz Usman-o-Ali.
U Azhar u la buh ïa ki kyndon kiba pyrkhing bha na ka bynta ki kynthei kiba ïasoh bad ka kynhun shipai, kim dei ban kren bad kino kino ki “shynrang ki bym don jingïadei lyngba ka phone ne ki nonglam khubor, lait noh tang ki kurim jong ki ne ki bahaïing hasem ba jan”.
