Shillong, Nohprah 04
Ka Hima Sohra ka la hap ban shimti ban pynïaid hi noh ïa ka jaka jngohkai pyrthei ha Dainthlen kaba don ha shnong Laitduh ba kan plie noh na ka bynta ban khring biang ïa ki nongjngohkai pyrthei kiba wan sha Sohra.
Hadien shisnem eiei ba la khang ïa ka Dainthlen kaba dei ka jaka jngohkai pyrthei kaba itynnad ha Sohra, mynta la plie biang ïa kaba la pynïaid da ka Hima Sohra.
Hadien ka jingïapher jingmut, ka Hima Sohra ka la shimti noh ïa ka Dainthlen kaba la plie mynta la ar bnai eiei.
Naduh ba la khang ïa ka Dainthlen, kiba bun ki nongjngohkai pyrthei ki shu peitkai na surok namar kim ïoh lad ban leitkai watla ki itynnad ïa ka jingdon ka um hajrong ki mawsiang.
Haba ïakren bad ka Kong Hun kaba dei kaba shong dukan ha Dainthlen ka la ïathuh ba ki dang duna ki nongjngohkai pyrthei kiba wankai namar ka aiom jong ki ka la kut namar mynta por tlang ka um ba tuid ka la duna, kumta ka la dei sa ka aiom ïa kiba napoh ka Jylla ba kin wankai haba ki skul ki la ïoh shuti.
Ka la kyntu ïa ki paidbah lada ki wankai ym shah shuh ban shet ha Dainthlen hynrei la don da kawei ka jaka ba lah ban shet ïa kiba wan bamkhana, nangta la kyntu ïa ki paidbah kiba wankai lada ki la dep bam ki dei ban bret shi jaka.
Ka la pynpaw ba ka don ka jingduhnong kaba khraw naduh ba la khang ïa ka Dainthlen ha kaba kam shym la ïoh ban wan shong dukan namar hap shong ïing noh.
Shuh shuh ka la pyntip ba kiba bun ki nongjngohkai pyrthei ki wan ha Dainthlen ki hap leit phai noh watla ki itynnad ïa ka jaka ha ka por lyiur ba dap ka um hajrong ki mawsiang.
Ka don jingkyrmen ba mynta ka tlang kin bun kiba wankai namar kane ka jaka ka long kaba suk ban ïalam ïa ki khyllung khynnah namar ka dei ka jaka kaba madan.
