Shillong, Nohprah 04
Ka Hill State People’s Democratic Party (HSPDP) kaba dei kawei na ki seng saiñ pyrthei kaba la rim bad kaba la lamkhmat ïa ka jingdawa na ka bynta ban pynïoh ïa ka Khasi-Jaiñtia State, kan sa leit ban ïasoh lang ha ka jingshong ïakhih ban pynlong da ka National Federation of New States ha Jantar Mantar, New Delhi, ha ka taïew kaba ar ne ba lai jong une u bnai.
Ïa kane ka rai la shim ha ka jingïalang jong ka National Federation of New States, kaba kynthup ïa ka HSPDP, ka Garoland Statehood Movement Committee bad kiwei ki seng na kylleng ki bynta jong ka jylla, kaba la long ha u bnai Nailar jong une u snem.
“Kan don ka jingïashong kyllain mungor jong baroh ki nongïalam hapoh ka lama jong ka National Federation of New States ha Jantar Mantar ha New Delhi kaba la buh ban pynlong ha ka taïew kaba ar ne ba lai jong une u bnai ban nang pynbor ïa ka Sorkar Kmie ba kan pyrkhat noh ha ka ban thaw ïa ka jylla kaba thymmai,” la ong u President ka HSPDP u Bah KP Pangniang haba kren bad ki nongthoh khubor ha ka sngi Palei.
“Ka long ka jingshisha ba kane ka jingdawa ka lah ban shim por da ki bun bun snem hynrei ngi don ïa ka jingngeit kaba khlaiñ ba ha kawei ka sngi ka jingïohi ka jong ngi ban ïoh ïa ka Khasi Jaiñtia State kan sa urlong,” u la ong.
Haba kdew ba kane ka jingdawa ka dei ka jingïohi jngai lypa da ki nongïalam ba la leit, u Bah Pangniang u la ong, “Ka la dei shisha ka jingdawa kaba la neh slem hynrei ka dei pat kaba la ïohi jngai lypa da ki nongïalam. Ka dei ka jingïohi jong u nongïalam barim jong ngi, u Bah Hoping Stone Lyngdoh (bam kwai ha dwar U Blei) bad u nongïalam ka GNC u Clifford Marak (bam kwai ha dwar U Blei) bad kiwei ki nongïalam kiba la dawa ïa la ka jong ka jylla.”
