Shillong, Nohprah 05
U Bah Roykupar Synrem, President ka Hynñiewtrep Youth Council (HYC) u la ïathuh ba ka Lum Survey ka dei ka jaka kaba long pdeng ban khaïi ïa u jingdih pynbuaid u Drok sha kylleng ka Nongbah Shillong.
Haba kren sha ki lad pathai khubor ha ka sngi Thohdieng jong ka taïew, u Bah Roykupar Synrem u la ong ba haduh mynta ka Sorkar kam shym la pat leh eiei halor ka jingdawa ka seng ban kyndang noh baroh ïa ki briew kiba sah be-aiñ ha ka tei ka jaka.
“Ka seng, dang ha kine ki khyndiat sngi ka la leit ban kyndang ïa ki briew kiba sah be-aiñ ha Lum Survey bad ba ka dei ruh kawei ka jaka pdeng ban khaïi ïa u Drok bad ha ka jingleit kyndang, ka seng ka lap ba baroh ki briew ba sah ha katei ka jaka dei kiba shu sah be-aiñ khlem da ïoh jingbit,” la ong u Bah Roykupar.
Haba kylli, u Bah Roykupar u la ïathuh ba katei ka jaka ha Lum Survey ka dei hapoh ka jingkhmih jong ka Shillong Cantonment Board bad ka dei ban leh eiei noh mardor bad kadei ban leit kyndang noh ban nym shah shuh ba kin sah ha ka tei ka jaka.
U Bah Roykupar u la byrngem ruh ba lada ka Sorkar kam pat leh eiei ban kyndang ïa ki briew kiba sah be-aiñ ha Lum Survey, na ka liang ka Seng bad ki nongshong shnong kin sa leit ban kyndang hi noh.
“Mynta ka la ïaid la shi snem tam eiei naduh ba ka HYC ka leit ban kyndang ha Lum Survey, ha kaba la lap ba ki briew ki shu sah be-aiñ bad i saitmet ruh ban peit. Ngi ïohi ruh ba na ka por sha ka por ka ANTF ka leit ban kem bad kyndang ïa ki briew ba khaïi Drok ha katei ka jaka bad ka Sorkar ka tip ruh ba ki briew ba sah ha katei ka jaka dei kiba sah be-aiñ. Ka seng kam lah shuh ban shu sngap ïa kane ka jingmynthi ka Sorkar namar kam shym leh eiei ïa ki briew ba sah ha katei ka jaka,” u la ong.
U la ong ruh ba ka jingleh jong ka Sorkar ka long pynban ka jingai mynsiem ban kharoi ki kam sniew ha katei ka jaka, da kaba ïa die ïa thied ïa u Drok bad ban sah beaiñ ruh kumjuh. Kumta u la byrngem ba lada jia ba ka Sorkar kam leh eiei ki nongshong shnong ryngkat bad ka seng kin sa leit hi ban kyndang.
“Ngi tip shai ruh ba ka jingpyn saphriang ïa u Drok hapoh Nongbah Shillong ka dei lyngba katei ka jaka kaba don ha Lum Survey. Kine ki briew kiba sah ha Lum Survey, ym dei tang kiba sah be-aiñ hynrei kim shym ïoh jingbit ruh la ka long na ka Sorkar ne na ka Shillong Cantonment Board,” la ong u Bah Roykupar.
U la buh jingkylli ruh ba balei mynta ka shisnem tam naduh ba ka seng ka la lap ba ki briew ki shong be-aiñ, balei ka Sorkar Jylla kam shim kano-kano ka sienjam ban leh eiei bad ban weng noh ïa kine ki briew?
