Shillong, Nohprah 05
Hato ka Mawkasiang ka lah ne em ban khanglad ïa ka Langsning FC ban jam shakhmat ha ka lympung ïalehkai SSA Champions Cup 2025, kaba la buh ba kan long ha ka sngi Saitjaiñ ha ka por 4:30 nohphai sngi ha SSA Stadium kaba ha First Ground, Polo.
Ki khmat mynta baroh kin phai pat sha kane ka jingïakhun kaba kongsan tam na ka bynta ka Group-A, ha kaba ka Langsning FC kaba la rah ruh ïa ka nam kum ka lahduh ha ka Shillong Premier League (SPL), ka donkam ïa ka shi point ban pynpoi pat ïa ka sha ka kyrdan ïakhun ka semi final jong kane ka lympung.
Katba na ka liang ka kynhun ïalehkai ka Mawkasiang kaba dei ruh ka lahduh ka lympung ïalehkai Fourth Division mynta ka snem, ka donkam beit ïa ka jingjop ba kan lah lem ban buh jaka ïalade sha kane ka kyrdan ïakhun jong ka semi final.
Hynrei kumno re kumno lada jia ka Mawkasiang ka ïeng ïakhun tyngeh bad lah ban ïalehkai bha, kan long shisha ka khubor ka ban pynshaïong ïa ki kynhun ïalehkai kiba don ha ka SPL bad First Division.
Kumba ka long ka Mawkasiang na ka bynta kane ka jingïakhun kam da don eiei than eh ïa ka, kam pher ïa ka jop ne rem, hynrei kumba ka long ka jingrung madan jong ka, ka long ba kan ïai bteng ïa ka nam bad ka rukom ïalehkai kaba bha bad ba khlaiñ jong ka, kumba ka la pynpaw ha baroh shi bynta jong ki jingïakhun ba ka la dep shakhmat.
Hynrei ka ban kham tynjuh borbah hi kan dei ïa ka kynhun ki rangïalehkai ka Langsning FC, ba da lei lei kim lah ban kheiñ sting ïa kane ka jingïakhun.
Lada yn ïa buddien bha ïa kane ka kynhun hapoh ka jingïalam u Bah Khlaiñ Pyrkhat Syiemlieh kum u coach, ka jingïakhun jong ka Langsning FC ha kane ka lympung kam shym la pynhun satia ïa ka mynsiem uba bun.
