Shillong, Nohprah 05
Ki nongïalam jong ka Mawmluh Cherra Cements Employees Union (MCCEU) ki la dawa ïa u Myntri Rangbah ka Jylla, u Conrad K Sangma ban pyllait noh ïa ka pisa jong ki nongtrei ka MCCL kiba trei kum ki ‘contract basis’, ki ‘trainee’ bad kiwei de ki bym dei ki nongtrei ba pura, ban ïarap ba kin lah ban pynbiang ïa ka ïing ka sem.
Haba kren sha ki lad pathai khubor, u President ka MCCEU, u Bah Pynskhem Lyngdoh u la ai khublei ïa ka Sorkar kaba la pyllait kloi ïa ka skhim kaba ki la mang na ka bynta ki nongtrei ka MCCL.
U Bah Pynskhem Lyngdoh u la kyntu ruh ïa u Myntri Rangbah ban pyllait noh sa ïa ka jingsiew ba khatduh (Last Instalment) kaba ki dei ban ïoh, khnang ba kin lah ban pyndon kam na ka bynta ka jingmyntoi jong ki bad ka ïing ka sem. “Lada ka Sorkar ka lah ban pyndep mynta u snem kan long kaba bha shibun eh,” u la bynrap.
U la ong ruh ba ka Sorkar ka dei ban pyrkhat lem na ka bynta kito kiba trei ‘contractual’, ‘ki trainees’ kiba la trei ha ka MCCL.
“Ngi don ka jingkyrmen ba ka Sorkar kan ai kloi ïa ka song pisa kaba ki dei ban ïoh, khnang ba kan long ka jingmyntoi, ba ki nongtrei ka MCCL kin lah ban ïeng ha la ki jong ki kjat, bad kan long ka jingïarap ïa ki, ïa ka ïing ka sem, ka shnong ka thaw bad ïa baroh,” la ong u Bah Pynskhem.
Na ka liang u Bah Arnold L Thabah, Secretary ka MCCEU u la ïathuh ba ka Sorkar ka la ïarap bad kaba sah mynta ka dei satang ka ‘last Installment’, da kaba kyntu ïa ka Sorkar ban pyllait noh kham kloi.
U la bynrap da kaba ong ba ka Sohra ka la kiew bha mynta ha ka kam jngohkai pyrthei, “Ki don ki nongtrei ka MCCL kiba sngewtynnad ha ki kam jngohkai pyrthei ka jingpyllait ïa ka pisa kaba sah kan long ka jingmyntoi shibun na ka bynta jong ki.”
Haba ïadei pat bad ki nongtrei kiba dei ki ‘contractual’ bad ki ‘trainees’, u Bah Arnold u la ong ba kim tip la ka Sorkar ka don da ka wei ka jingthmu ban ïarap ïa ki, hynrei kum ka kynhun ka kyrpad ïa ka Sorkar ban phai khmat lem bad ban ïarap ïa ki, namar ma ki ruh ki dei ki nongtrei kiba la trei ban kyntiew ïa ka MCCL ha ki snem ba la dep.
Ka Sorkar ka don ïa ka lad ban ïarap ïa ki, namar bun ki kam kiba ïadei bad ki kam jngohkai kiba ka Sorkar ka lah ban pynrung ïa ki ban ai kam ai jam bad ban bhah kyrpang na ka bynta jong ki, namar ma ki ruh ki don ka ïing ka sem ban pyndap pynbiang, la ong u Bah Arnold.
Shuh shuh u la pynpaw ruh ïa ka jingsngewnguh ïa kaei kaba ka Sorkar ka la leh na ka bynta jong ki, kum ki nongtrei ka MCCL.
