Shillong, Nohprah 05
Ka Lam’ti Foundation kaba buh hakhmat ïa ka thong ban sumar, ban ai jingshakri ïa ki briew kiba la ngat bad ba la kyrni ha u drok, ha ka 5 tarik Nohprah 2025 ka la ïoh ban plie ïa ka ‘Rehabilitation Centre’ kaba don ha Laitkor Mawrie.
La wan ban plie ïa kane ka ‘Rehabilitation Centre’ da u nongaibuit ka tnad Social Welfare u Bah Paul Lyngdoh, ha ka jingdon ryngkat u Mission Director ka DREAM u Bah Francis Kharshiing ha ka jingïadonlang kiba la shah khot sngewbha, kiba haïing hasem jong kiba la kyrni ha u drok, ba dang shah sumar, ki dkhot Dorbar Shnong bad kiwei.
Haba ai jingkren ha ka jingïalang u Bah Paul Lyngdoh u la ai khublei ïa ka jinglah ka kynhun ka Lam’ti Foundation na ka bynta ban peit ban sumar ïa ka bha ka miat jong ki briew kiba la kyrni ha u drok bad ha ka imlang sahlang.
U la ai mynsiem ruh ïa ka Lam’ti Foundation da kaba ong ba “Haba phi lam’ti, phim lah ban ïalam tang da iwei i shympriah kti, hynrei donkam baroh artylli ki kti bad to pyndonkam ïa kita baroh.”
“Kiba bun na ngi, ngi biang bha ki khmat ban ïohi hynrei ngim don ïa ka jingïohi jngai, ngi biang baroh ar tylli ki shkor ban ïohsngew hynrei ngim sngap, ngi don artylli ki kti, hynrei kita ki kti ngi pyndonkam ha kaba bam bad kiwei ki kam, hynrei kita ki kti ki la ktah ne em ïa ka jingdonkam jong kiwei” la buh jingkylli u Bah Paul.
U la kyntu ruh ïa ka Lam’ti Foundation ba kan shim bad niewkor bad ban ieit ïa ka kam kaba ki la shim bad ban pynthikna ruh ba ki la ai eiei sha ka imlang ka sahlang.
