Shillong, Nohprah 05
U Rangbah Shnong ka Dorbar Shnong Nongmynsong u Bah Phrang Warjri u la ïathuh ba u la ïoh jingujor na ki nongshong dukan ba na ka jingpyntreikam ka Sorkar Jylla ban lum bai pynïeng kali (Parking) ha ki rud surok, ka la ktah ïa ki nongshong ïew bad dukan, namar ba ym don shuh ki kali ba ïeng ban thied jingthied.
U la ïathuh ba ka Sorkar Jylla ka lum ïa ka bai pynïeng kali ha kitei ki bynta, kata T.20 ïa ki ar shaka bad T. 40 ïa ki kali, na ka bynta shi kynta, kaba pynlong ïa kiba ñiah kali ban kiar ban ïeng kali ha kitei ki jaka, kane ka la ktah ym tang ïa ki nongshong ïew bad dukan, hynrei ka ktah wat ïa kiba leit donkam ha ïew, ha ki bank bad kiwei-kiwei ki kam.
U la ïathuh ba haba ïadei bad kane ka bynta u la ïohpdiang ïa ki jingujor na kiba shong dukan, bad halor kane ka bynta ka Dorbar Shnong kam shym la shong kli kti, ka la phah jingthoh sha ki bor ba halor ban pynsngew ïa ki jingkynduh jingeh ki nongshong ïew bad dukan ba ka Sorkar ka donkam ban kham pynduna ïa ka bai pynïeng kali.
Halor kane ka bynta, ha ka 05 tarik u Nohprah, 2025 ka la don ka jingjurip na ki bor District ba la mihkhmat da u Bah PT Passah, Additional Deputy Commissioner bad ki nongïalam Shnong ban peit bniah ïa ka shi lynter bad ki ar liang surok ka shnong.
U Bah Phrang u la pyntip ba ha kane ka jingjurip, la ïa pynbeit ba kan don ka jaka ïeng kali ba ym donkam siew eiei, kata ha khap kynroh ka Atomic Minerals Directorate (AMD) na ki bynta ki briew kiba shu wan thied jingthied ne donkam hynrei kim dei ban ïeng slem pat.
U la ïathuh ba haba ïadei bad ka jingrem ka dor bai ïeng kali, u ADC u la kular ban phah jingtip sha ki bor ba kham halor na ka bynta ban ïa pynbeit ïa kane.
