Nongstoiñ, Nohprah 05
Ka Village Defense Primary Committee Nongstoiñ Area (VDPCNA) ka la ïoh ban pynthymmai noh ïa ki nongkitkam na ka bynta ka samoi treikam jong u snem 2025 -2028 ha kaba u A.J.Sangma Deputy Superintendent of Police ka West Khasi Hills District kum u Symbud Kongsan u la ïoh ban pyntian smai.
Ïa katei ka jingïalang la pynlong hapoh Bishop Hall New Nongstoiñ da ka jingwan ban sakhi bad ïadonlang ruh u Bah Gabriel Wahlang MLA ka Nongstoiñ kum u kongsan ryngkat bad kiwei-kiwei ki riew rangbah jong ka thaiñ.
Ki nongkitkam kiba kham hakhmat jong katei ka kynhun jong ka Village Defense Primary Committee Nongstoiñ Area kiba shah pyntian smai ki kynthup ïa u Bah Mawkordor Kharsyiemlieh kum u President, Bah Basaiñdurlang Lyngdoh Nonglait General Secretary, Bah Sharaikyrpang Hoojon Organising Secretary bad u Bah R.S.Khardewsaw kum u adviser bad kiwei-kiwei ki dkhot.
U Bah Gabriel Wahlang MLA haba kren kum u kongsan u la ong ba ka jingshongshit hapoh ka shnong ka thaw ka dei eh ha ki trai shnong bad kita ki trai shnong ki dei ha ka jingïalam jong ki VDP.
U la ong ruh ba ki VDP ki dei kiba nyngkong tam ki ban ïada ïa ka shnong ban ïarap ïa kiba shem jynjar, ki ban ïaid ïa ka miet ka ïong, kiba pynduna ïa ki nongleh kam sniew hapoh ka shnong bad ki don ka jingïatrei ba jan bad ki pulit, bad ki dei ruh ki pulit ba ar ha ki shnong ki thaw.
“Ki dei ki nongshah tim ha ki katto katne ki dei ki nongshah ïaroh ha ki katto katne bad ha ka jing ïaid lynti ka jong phi phin lap kan don ka jingkyrkhu bad ka jingshah tim bad ka jingdon jong ki VDP kala ïarap shisha ha ki shnong ki thaw bad khamtam hapoh ka ïew Nongstoiñ bad kiwei ki nangthiah phi phi nangpeit miet” ong u Bah Gabriel da kaba u la kyntu ruh da kaba ong “To nangshakri ïa kane ka kam”.
Shuh shuh la pynshit pynshngaiñ ruh ïa katei ka sngi da ka jingrwai na ki samla.
