Shillong, Nohprah 05:
U Myntri ka tnat Legal Metrology ka Sorkar Meghalaya u Bah Sanbor Shullai u la ai jingmut ïa ki Ophisar ka tnat ban peit ïa ka Phlim ‘Nayak’ kum ka nuksa, kumno ban leh ïa ki trai dukan kiba pynkheiñ ïa ka aiñ jong ka Legal Metrology Act 2009.
Ïa kane u Bah Sanbor u la ai jingmut ïa ki Ophisar haba pynïaid ïa ka jingïalang jong ka tnad Legal Metrology ka Sorkar Jylla ban bishar ïa ki kam haba ïadei bad ka jingpyntreikam ïa ka aiñ 2009.
Haba kren sha ki lad pathai khubor u Bah Sanbor u la hukum ïa ki Ophisar ban trei hok ïa ka kam bad ban sdang ban leit jurip ïa ki dukan ha kylleng ki jaka na bynta ban lap, haduh katno ki trai dukan ki pyntreikam hok ïa ka rukom thew ïa ka jingkhia ki mar ki mata kaba dei ka hok jong ki paidbah.
“Nga kyntu ïa ki Ophisar ba ki dei ban peit ïa ka Phlim ‘Nayak’ ba ak u Anil Kapoor kaba pyni ba u trei hok ïa ka kam ha kaba wat tang shi sngi u la ïoh ban pynshitom ïa ki bun ngut ki trai dukan kiba pynkheiñ ïa ka aiñ thew kilo ïa ki mar mata bad kumjuh ruh ïa ki Ophisar ki bym trei hok ïa ka kam kumba la bynshet ha ki” la ong u Bah Sanbor.
Nalor kane u Bah Sanbor u la kyntu ïa ki nongshong shnong ka Jylla, ba ki dei ban pyntip ïa kino-kino ki jingleh thok jong ki trai dukan bapher-bapher, la ka dei ha ki Petrol Pump, ki Weigh Bridge lane ki dukan ba die ïa ki mar ba la song lypa.
“Lada phi lap ba don ka jingleh thok ha kaba thew ïa ki mar ki mata, sngewbha ujor sha ki Inspector, sha ki pulit, lane ujor sha nga bad ngan pynthikna ba kita kiba leh thok kin shah pynngat ha ki kyndon aiñ jong ka Legal Metrology Act 2009 ” u la ong u Bah Sanbor.
U la bynrap ba u la bthah ïa ki Ophisar ban pynkhlaiñ ïa ki jingai jinghikai ban pynsngewthuh ïa ki paidbah (Awareness) khnang ba ki paidbah kin sngewthuh bad ba kin tip ba ka don ka aiñ ban leh pyrshah ïa kiba leh thok ha kaba thew jingkhia ïa ki mar ki mata.
