Shillong, Nohprah 05
Ka Manchester United kam shym la lah ban rung sha ka thup kaba san ha ka Premier League hadien ba ka la shah pynïakhaid mar 1-1 kol ha ka West Ham ha ka Old Trafford ha ka step jong ka sngi Thohdieng.
U Diogo Dalot u la pynkhih jar nyngkong bad kane ka long ka kol kaba nyngkong ha ki 19 bnai na ka bynta ban lamkhmat ïa kane ka kynhun jong u Ruben Amorim, hynrei kane kam shym la urlong hadien ba u Soungoutou Magassa ula lah ban pynphai na ka bynta ban ïasam mar shi point bad ka West Ham ka dangdon ha u laiñ jong ka jingma. Ka United ka la shah rem tang shisien ha ki phra tylli ki jingïalehkai ba la dep, hynrei ka lah ban don ha ka kyrdan kaba kham biang, hynrei ka la duh noh ïa ki point ba pura ha ka jingïakhun pyrshah ïa ka Nottingham Forest, Tottenham, Everton bad mynta sa ha ka West Ham.
Kumba ka long mynta ka United ka la don ha ka kyrdan ba phra ha kaba ka dangduna sa ar poiñ ban don ha ka thup kaba saw. Ka jingïakhaid ka pynlong ïa ka West Ham ban duna sa ar poiñ hapoh ka jingïalam u Nuno Espirito Santo ban lait u laiñ jong ka jingma. Na ka liang u Amorim u la pdiang sngewbha ïa u Matheus Cunha uba la wanphai na ka jingmynsaw ban pynkhlaiñ ïa ka jingïakhun jong ka United, hynrei katei ka kynhun ki dangduna ïa ka jingpynwandur bad ka jingkhlaiñ kaba donkam ban pynpra ïa ka bynta kaba shadien jong ka West Ham.
