Shillong, Nohprah 05
Ka tnad Legal Metrology ka Sorkar Meghalaya ha ka sngi Thohdieng ka la shong jingïalang ban bishar kam bad ha ka jingïalang ka la rai ban ïaid shakhmat ban pyntreikam ïa ka Legal Metrology Act 2009.
Haba kren sha ki lad pathai khubor u Myntri ka tnat Legal Metrology u Bah Sanbor Shullai u la pynbna ba u la ai por ïa ka tnad 60 sngi ban pyni ïa ka jingpyntreikam ba shisha kata ban jurip ïa ki dukan bapher-bapher ban pynthikna ba kam don ka jingpynkheiñ aiñ ha ki jingthew jingkhia ïa ki mar mata ha kylleng ka Jylla Meghalaya.
U Bah Sanbor u la ong ba ka long kaba sngewsih ban tip ba, wat hapdeng ki jingbym ïaid beit ïaid ryntih ha ki rukom thew ïa ki mar mata ha ki ïew ki hat, kynthup ki Petrol Pump, ki Weigh Bridge, ka tnad Legal Metrology naduh 1972 kam pat ju pynshitom ïa kiba pynkheiñ ïa ka aiñ Legal Metrology Act 2009.
U la ïathuh ba haduh mynta ka tnad Legal Metrology jong ka Sorkar Jylla ka treikam tang 13 ngut ki Inspector baroh kawei ka Jylla Meghalaya.
U Bah Sanbor u la ong, “Ka jingduna ki nongpeit nongkhmih (Inspector) ka la ktah bad pynthut ïa ka jingpyntreikam ïa ka aiñ Legal Metrology Act 2009 bad nga la bthah ïa ki Ophisar ban pynkhreh mardor ïa ki jingtyrwa ban thung kham bun ki nongpeit nongkhmih ha baroh ki District ka Jylla khnang ba ka jingpyntreikam ïa ki aiñ ka long kaba ïaid beit ïaid ryntih.”
Haba bynrap halor ka jingduna ki nongpeit nongkhmih (Inspector) ka Additional Secretary ka tnat Legal Metrology ka Kong Aldealyne Nikhla ka la pynpaw ba ka jingduna ki nongpeit nongkhmih ka long ka jingeh ïa ka tnad ha ka ban treikam na ka bynta ka jingmyntoi ki paidbah nongshong shnong ka Jylla.
“Tang uwei u Inspector um lah ban peit bad pyntreikam ïa ka aiñ ka Legal Metrology Act 2009 ha baroh ka District, namar teng-teng ki Inspector ki shah bhah kam kum ha ka kam ilekshon, ha ki kam VIP, ki jingïalang bad kiwei, kane ka khanglad noh ïa ki ban leit jurip ïa ki dukan bad ha ki shnong bapher-bapher” la ong ka Kong Aldealyne.
