Mawkyrwat, Nohprah 5:
Ka Ïingbishar lyngba u Special Judge (POCSO), South West Khasi Hills District, Mawkyrwat ha ka 26 tarik u Nailur 2025 ka la rai pynrem ïa u Sushanto Hajong na thaiñ Ranikor Civil Sub – Division da kaba set phatok 10 snem bad daiñ kuna T.15,000 halor ki kam runar jong u ha kaba u la leh be-ijot ïa kawei ka khynnah kaba dang 15 snem.
Katkum ka kyrwoh khubor na u Superintendent of Police, SWKHD u Bah B. Jyrwa u la ïathuh ba ha ka 28 tarik u Nailar 2019 ka la don ka jingmudui ejahar da ka kmie jong kane ka khynnah pyrshah ïa u Sushanto Hajong bad katkum ka ejahar la ong ba u Sushanto Hajong u la leh be-ijot ïa ka khun jong ka.
Ha kaba ïadei bad kane ka jingjia, ki pulit ki la rejistar ïa ka mukotduma ha thanad Ranikor katkum ki kyndon aiñ jong ka POCSO.
Shuh shuh ïa ka jingtohkit ïa kane ka mukotduma la aiti ha ka WPSI J.M. Kurbah ban tohkit bad hadien ka jingtohkit la pynngat mukotduma ïa une u nongleh kam sniew ha ka 31 tarik u Nohprah 2019 bad la phah sha ka ïingbishar ban bishar.
Hadien ka jingbishar bniah ïa ki sakhi ba la ïoh katkum ki rekod, ka ïingbishar ka la rai pynrem ïa u Sushanto Hajong na ka bynta ki kam runar jong u.
