Nongpoh, Nohprah 5:
Ka Brup Hang Lang Tourism Promotion Society ha ryngkat ka jingïatreilang bad ka 7 Huts Production ha ka 5 tarik Nohprah 2025 ka la ïoh ban plie paidbah bad sdang ïa ka tamasa Amur Falcon ba ar sngi lynter kaba la pynlong ha ka shnong Umtngam jong ka thaiñ Mawhati, Ri Bhoi district.
Ïa kane ka tamasa la wan ban plie paidbah da u Dr. Celestine Lyngdoh, MLA jong ka Umsning Konstitwensi, uba dei ruh u ‘Chief Whip’ ka Sorkar Jylla ha ka jingïadon ryngkat u Bah Charles Marngar MLA ka thaiñ, u Abhilash Baranwal, Deputy Commissioner ka Ri Bhoi, ki nongïalam shnong jong ka thaiñ Tyrso nalor kiwei-kiwei de.
Ka jingthmu ban pynlong ïa kane ka tamasa ka long kum shibynta ban kyntiew ïa ka kam jngohkai pyrthei ha kane ka thaiñ kaba dei ruh ka jaka ïaid lynti bad shong jahthait ba shipor man la u snem jong ki sim Amur Falcon kiba wan ïaid lyngba na kylleng ki ri ka pyrthei nalor ka jingpynsaphriang paidbah ïa ka jingdonkam ban pynneh pynsah bad sumar ïa ki sim ki doh bad ka mariang sawdong sawkun.
Ha kane ka sngi sdang jong ka tamasa la ïoh shwa ïa ki jingpynshai paidbah da ki ophisar ka tnad Wildlife bad Forest halor ka jingdonkam ban pynneh pynsah bad sumar ïa ka mariang, kaba la pynbud pat sa ka jingïakop ïatem ïaput hapdeng ki kynhun bapher-bapher kiba la wan ban ïashim bynta na kylleng ki jaka nalor ki nongrwai ba pawnam ka Jylla ki ban wan ban pynshongshit ïa ki paidbah.
Ha kane ka tamasa ka don ruh ka jingdie ïa ki jingbam tynrai Khasi, ki jingïalehkai na ka bynta ki khyllung khynnah, ka jingdie ïa ki wine bapher-bapher kiba la pynmih na ka Jylla nalor kiwei-kiwei kiba khring bad pynbyrngia ïa ki paidbah nongwan peitkai.
Ha ka sngi kaba ar pat ka 6 tarik Nohprah 2025, kaba dei ruh ka sngi pynkut ïa katei ka tamasa kan don pat ka jingïakop mareh marathon ka ban sdang ha ka por mynstep, pynbud pat sa ka jingïakop ñiah bicycle, ka jingrwai na ki nongrwai ka Jylla bad ruh ka Housie Bumper kaba T.10 lak ha ka por miet.
